У сярэдзіне лістапада мы ўжо пісалі пра дзіўную гісторыю Сяргея Гапона, нарадзінца Беларусі, але грамадзяніна РФ, які апынуўся ў ІЧУ яшчэ ўвесну 2018-га праз тое, што міліцыя і чыноўнікі не змаглі разабрацца з ягоным грамадзянствам. Пры канцы мінулага месяца ён выйшаў на свабоду.
Праз сем дзён пасля з’яўлення артыкулу на Belsat.eu, Сяргею Гапону ў Валожынскае ІЧУ прыйшоў ліст з Расейскай амбасады. Маўляў, там нарэшце ва ўсім разабраліся: ён грамадзянін РФ і можа быць туды дэпартаваны.
Ліст з амбасады Расеі. Там пацвердзілі, што Сяргей Гапон – расеец. Нагадаем, што папярэдне чыноўнікі з амбасады адмаўляліся прызнаваць наяўнасць грамадзянства РФ у Гапона, што выглядала максімальна дзіўна: той прысягаў і служыў ва ўзброеных сілах Расеі, меў пра гэта сведчанні і дакументы. Беларускі бок, у сваю чаргу, не мог яго дэпартаваць, бо ў гэтым выпадку патрэбная краіна, якая прыме чалавека – так Сяргей і правёў у ІЧУ амаль 8 месяцаў…
«Калі будзеце нешта пісаць, то мой выхад на свабоду стаў рэальным, дзякуючы маёру Зміцеру Вяроўчыку (начальнік РАУС Валожына – Belsat.eu) і вам. Карацей, дзякуй вам, хлопцы, бо робіце добрую справу! Вы ўзламалі гэты збой у матрыцы», – сказаў Belsat.eu Сяргей Гапон.
Ці звязаная замена папярэдняга начальніка Валожынскага РАУСу на цяперашняга з ягонай гісторыяй, якая выплыла ў СМІ, Сяргей не ведае. Усю сітуацыю Сяргей па-ранейшаму лічыць нонсэнсам:
«Як чалавек з незразумелым грамадзянствам мог адслужыць у Расеі?! Адказы з амбасады бязглуздыя… На 1992 год я яшчэ жыў у Беларусі, а ў Расеі прысягу прымаў у 1996-м», – абураецца былы вайсковец.
Цяпер Сяргей Гапон ужо знаходзіцца ў Расеі: міграцыйная служба паставіла яму вельмі кароткі тэрмін, каб пакінуць Беларусь, а ў дадатак забараніла ўезд сюды на паўгады.
Дадзенае рашэнне Сяргей збіраецца аспрэчваць у судовым парадку: у Беларусі ў яго засталася маці, тут пахаваны бацька, у Лідзе ды Горадні жыве багата сяброў і знаёмых.
АК, фота Васіль Малчанаў/Belsat.eu
