Некаторыя кліенты «Белгазпрамбанку» напісалі заявы ў банк праз тое, што без іх прысутнасці ўскрывалі іхныя дэпазітарныя ячэйкі, у выніку чаго частка змесціва згубілася, піша TUT.by.
Ускрыццё ячэек і знікненне іх змесціва выявілася, калі ўладальнікі на гэтым тыдні змаглі праверыць іх. Дэпазітарныя ячэйкі размешчаны ў галаўным офісе «Белгазпрамбанку», дзе 11 чэрвеня прайшлі ператрусы. Да 23 чэрвеня кліенты праз следчыя дзеянні не маглі паглядзець, ці на месцы змесціва ячэек.
Калі для кліентаў зноў адкрылі доступ да ячэек, некаторыя з іх выявілі, што некаторыя дэпазітарныя ячэйкі былі ўскрытыя. У выніку некалькі чалавек напісалі заявы ў банк з прэтэнзіямі на ўскрыццё дэпазітарных ячэек без іх прысутнасці і знікнення змесціва.
Некаторыя каштоўныя рэчы кліентаў банку маглі патрапіць у кадр сюжэту на «Беларусь 1» пра «Белгазпрамбанк», які выйшаў 13 чэрвеня. У відэа заяўлялася, што падчас следчых дзеянняў канфіскаваныя звыш $ 4 млн, а таксама каштоўныя паперы на звыш як $ 500 тыс., золата, каштоўнасці, прылады для кіравання рахункамі за мяжой і іншыя рэчы.
Праз адрасы на некаторых скрынках і надпісы на аблігацыях кліенты банку выказалі здагадку, што ў кадр трапілі іхныя рэчы з ячэек.
У адказ на звароты грамадзянаў, банк паведаміў, што яны «ўтрымліваюць пытанні, рашэнне якіх не адносіцца да кампетэнцыі ААТ «Белгазпрамбанк». Звароты накіраваныя для разгляду ў Дэпартамент фінансавых расследаванняў Камітэту дзяржаўнага кантролю.
18 чэрвеня ў Беларусі быў затрыманы патэнцыйны кандыдат у прэзідэнты Віктар Бабарыка, які з 2000 па 2020 гады кіраваў «Белгазпрамбанкам». Агулам па справе Белгазпрамбанку затрыманыя каля 20 чалавек.
«Бабарыка з’яўляўся непасрэдным арганізатарам, кіраўніком супрацьпраўнай дзейнасці, спрабаваў уздзейнічаць на сведкаў, схаваць сляды раней здзейсненых злачынстваў і літаральна на днях зняць буйную суму грошай з падкантрольных яму рахункаў», – заявіў у эфіры «Беларусь-1» кіраўнік КДК Іван Церцель.
Павлодле яго, вядзецца праца па некалькіх кірунках: першы – махінацыі з вэксалямі на суму звыш $ 60 млн, у выніку якіх на замежныя рахункі, нібыта былі выведзеныя вялікія сумы.
Акрамя таго, Церцель сцвярджае, што КДК выявіў «адмывачныя схемы», па якіх у замежныя банкі гэтыя сумы нібыта выводзіліся.
«У прыватнасці, адной з такіх структур з’яўляўся латвійскі банк ABLV. Згодна з дадзенымі, атрыманымі ад нашых латвійскіх калег, за некалькі гадоў у інтарэсах гэтага банку на ягоныя рахункі з рахункаў Белгазпрамбанку было выведзена больш за $ 430 млн», – дадаў кіраўнік КДК.
Адметна, што банк ABLV быў ліквідаваны яшчэ ў 2018 годзе.
МГ belsat.eu