Палітолаг: «Зяленскі страціць папулярнасць, калі пойдзе на «дагаварнякі» са старымі элітамі»
Адмысловец Украінскага інстытуту будучыні Ігар Тышкевіч пракаментаваў журналісту belsat.eu вынікі парламенцкіх выбараў. Паводле яго, Зяленскі фактычна захаваў свой базавы электарат. Для «Слугі народу» цалкам выгодна як самастойнае фармаванне ўраду, гэтак і праца ў кааліцыі, упэўнены палітолаг.
«Для выбарнікаў Зяленскага непрымальныя ані «Еўрапейская салідарнасць», ані Цімашэнка, ані Медведчук. Ёсць адна простая прычына – гэта прадстаўнікі старой эліты, якая сёння не карыстаецца даверам у насельніцтва. Калі Зяленскі пачне вяртаць сістэму, якая была да Парашэнкі ці захоўваць яе і пойдзе на дагаварнякі, адразу згубіць падтрыманне. Без варыянтаў.
Калі пойдзе на кааліцыю з Медведчуком, згубіць цэнтр і захад. З Парашэнкам – цэнтр і ўсход. З Цімашэнкай – усю Украіну. Таму дагаварнякі са старымі элітамі для яго немагчымыя. То бок трэба будзе праводзіць рэформы і вельмі непапулярныя рэформы, шчыміць хвост алігархам і г.д. Медыйныя атакі будуць плюс фактар РФ», — робіць першыя высновы Ігар Тышкевіч.
На думку эксперта, цяпер Украіну чакае больш агрэсіўная вонкавая палітыка і больш рацыянальная.
«Самы вялікі сюрпрыз у мажарытарцы – гэта колькасць мандатаў, якія атрымала партыя «Слуга народу. Гледзячы на бэкграўнд кандыдатаў ад «Слугі народу», яны выглядалі слаба. Але нават у такім фармаце людзі палічылі за патрэбнае абраць менш дасведчанага новага чалавека, чым старога гульца, які будзе праводзіць у парламенце звычайную палітыку дагаварнякоў або перадвыбарнае засяванне грэчкі.
Але ў гэтым выпадку грэчка не спрацавала. Калі можна было займацца чорным піярам, купляць людзей, але пры гэтым нават людзі, якія бралі грошы, яны казалі «дзякуй», і ішлі галасаваць за іншых. Гэта пэўнае сведчанне таго, чаму можна гаварыць пра электаральную рэвалюцыю».
Паводле прагнозу эксперта, каля 30 % новых дэпутатаў будуць працаваць няякасна.
«Гэта нармальна для новых людзей. Цяпер алігархі губляюць кантроль над Вярхоўнаю Радай, таму ў найбліжэйшыя месяцы яны будуць хадзіць за дэпутатамі ды прапаноўваць ім або грошы, або дадатковыя бізнесы ці штосьці яшчэ. Таму будзе гонка за мажарытарнікамі. З пункту гледжання вынікаў выбараў па ўсёй краіне, апроч Львоўскай вобласці і частак Данецкай і Луганскай, перамагае партыя Зяленскага.
Гэта фактычна першыя выбары, калі Украіна аб’ядналася цалкам. Гэта шанц і магчымасць для Украіны праводзіць рэфармаванні, не звяртаючы ўвагу на ўнутрыпалітычную грызню».
АД/ДР belsat.eu
