Новы суіцыд у беларускай арміі. 21-гадовы сяржант праглынуў сто таблетак «Но-шпы»

Надзвычайнае здарэнне адбылося ў Горадні, паведамляе блогер NEXTA.

Загінулы – 21-гадовы сяржант кантрактнай службы Фёдар Бунас. Ён быў намеснікам камандзіра ўзвода 3-яй роты 202-га батальёна раскватараванай у абласным цэнтры 6-й асобнай механізаванай брыгады.

«1 ліпеня вайсковец прыняў, мяркуючы па пустой упакоўцы, 100 таблетак прэпарата «Но-шпа» і выйшаў на вуліцу. Там яму стала кепска, выклікалі хуткую. Яна прыехала хутка, але выратаваць сяржанта лекары ўжо не змаглі. У якасці прычыны смерці ў дакументах падаецца «медыкаментозны інсульт»», – паведамляе блогер.

Праводзіцца расследаванне.

У Міністэрстве абароны пацвердзілі факт трагедыі. Напярэдадні Фёдар Бунас пасварыўся са сваёй дзяўчынай. Асабістыя матывы маглі стаць прычынай суіцыду.

«Праверка, вядома, вядзецца. Сям’я звярнулася да нас з просьбай не распаўсюджваць падрабязнасці і дэталі. Трагедыя здарылася паза вайсковай часткай у вольны ад службы час. Гэта асабістае жыццё вайскоўца», – распавяла belsat.eu прэс-сакратарка міністра абароны Беларусі Раўкова Наталля Гаўрусік.

ДР belsat.eu