Нядаўна прызначаны ў Беларусь амбасадар РФ Дзмітрый Мезенцаў заявіў журналістам, што ён чакае «цікавай працы, уключанасці калектыву амбасады ў велізарную ўзаемазвязаную і шматгранную дзейнасць» для пашырэння двухбаковых стасункаў.
Як перадае БелТА, Мезенцаў распавёў, што пры прызначэнні паслом атрымаў ад кіраўніцтва ўстаноўку:
«Зрабіць усё магчымае, каб маштаб і глыбіня адносін паміж Расейскай Федэрацыяй і Рэспублікай Беларусь былі яшчэ больш рэзультатыўнымі, каб гэта адчувалі людзі, каб захоўваліся традыцыі братэрскіх народаў, нацыянальнай славянскай культуры, эканамічнае ўзаемадзеянне, магчымасць і гатоўнасць пераймаць адзін у аднаго лепшы досвед», – сказаў дыпламат.
Адказваючы на пытанне, ці мае намер ён працягваць працаваць у той жа стылістыцы, што і папярэдні амбасадар Міхаіл Бабіч, Мезенцаў адзначыў, што «не можа параўноўваць свой стыль працы са стылем папярэдняга кіраўніка расейскай дыпмісіі, таму што раней з ім не працаваў».
«Спрэчкі трэба разглядаць праз прызму стратэгічнага партнёрства і той цудоўнай практыкі шматгадовых адносін, якую выбудавалі нашы народы, прадстаўнікі ўладных структур рэгіёнаў. Гэта ёсць найважнейшы вынік. Не бачыць гэтага, недаацэньваць – няправільна», – падкрэсліў ён.
Пасол запэўніў, што вельмі ўважліва ставіцца да настрояў і думку беларускага грамадства.
«Што тычыцца небяспекі і напружання, якое вы (журналісты – заўв.) адзначаеце, то стаўленне да гэтага павінна быць самае ўважлівае. Як з гэтым быць? Толькі большай адкрытасцю, тлумачэннем таго, што часам здаецца недагавораным, тлумачэннем крокаў, якія дазваляюць лепш разумець партнёра», – сказаў ён.
Нагадаем, папярэдні пасол Расеі Міхаіл Бабіч быў адкліканы з Менску пасля ягонага канфлікту з беларускім МЗС, калі бакі абяняліся даволі рэзкімі рэплікамі. 10 траўня Бабіч пакінуў Менск.
КА belsat.eu
