На нарадзе з міністрамі і сілавікамі 10 студзеня Аляксандр Лукашэнка распавёў, што да беларуска-расейскай інтэграцыі не гатовыя ані ў Менску, ані ў Маскве, падае president.gov.by.
Аляксандр Лукашэнка прызнаўся, што пытанні пра аб’яднанне з Расеяй і аўтакефалію беларускай Царквы сёння перад ім не стаяць.
«Я называю гэтыя пытанні вельмі дурнымі, прыцягнутымі за вушы для абмеркавання ў нашым грамадстве, – сказаў Аляксандр Лукашэнка. – Мы з прэзідэнтам Расеі адназначна вызначылі, што сёння на парадку дня пытання аб аб’яднанні няма».
Паводле Лукашэнкі, абодва бакі не гатовыя да аб’яднання.
«Няма такой магчымасці ў Расеі, улічваючы наступствы ўсяго, на гэта пайсці. Трэба супакоіцца і спыніць гэтыя размовы, што хтосьці кагосьці нахіліў або нахіляе. Тут ніхто нікога не нахіліць», – працягнуў ён.
Кіраўнік дзяржавы адзначыў, што саюз Беларусі і Расеі можа развівацца толькі на раўнапраўнай аснове.
«Няма раўнапраўнай асновы – няма саюзу», – сказаў кіраўнік Беларусі.
Паводле Лукашэнкі, галоўнае пытанне, якое паўстае сёння ў дачыненнях з усходнімі суседзямі, – што рабіць з саюзнай дамоваю.
«Трэба сядаць за стол і глядзець, што мы разам можам сёння паводле дамовы вырашыць, на што мы можам без усякага ціску пайсці», – заявіў Лукашэнка.
Кажучы пра гаспадарчую супрацу з Расеяй, Лукашэнка заявіў, што нявырашанымі застаюцца пытанні паставак беларускіх харчоў у Расею.
«Мы з прэзідэнтам Расеі дамовіліся, што гэтыя ганебныя пытанні трэба здымаць, каб яны больш ніколі не стаялі на парадку дня нашых перамоў на вышэйшым узроўні», – падкрэсліў кіраўнік дзяржавы.
Паводле Лукашэнкі, 2019-ы год будзе нялёгкім, бо ён – перадвыбарчы.
«У нас дастаткова пытанняў, якія трэба вырашаць лепш, чым яны вырашаюцца ў цяперашні час. Мы ўмеем развязваць гэтыя пытанні», – дадаў кіраўнік Беларусі.
ДД