У Жытоміры праходзіць ІІ Форум рэгіёнаў Украіны ды Беларусі, дзе сабраліся сотні прадстаўнікоў бізнесу, кіраўнікі дзяржаўных прадпрыемстваў, дыпламаты і высокапастаўленыя чыноўнікі дзвюх краінаў, паведамляе карэспандэнтка belsat.eu.
Напярэдадні сустрэчы Аляксандра Лукашэнкі і Уладзіміра Зяленскага на палях форуму адбылося восьмае паседжанне ўкраінска-беларускай Кансультатыўнай рады дзелавой супрацы.
Адкрыў паседжанне ў вялікай зале Жытомірскай абласной рады прэзідэнт Гандлёва-прамысловай палаты Украіны Генадзь Чыжыкаў. Паводле яго, летась падчас форуму беларускія і ўкраінскія кампаніі заключылі кантракты на агульную суму звыш $ 100 млн, а сёлета плануецца «павялічыць гэтую лічбу ў пяць разоў».
Падпісанне кантрактаў на Форуме рэгіёнаў у Жытоміры. Фота belsat.eu
Чыжыкаў адзначыў, што на сёлетнім форуме рэпрэзентаваныя ўсе рэгіёны Беларусі і 22 украінскія: «Мы навучыліся гандляваць, мы разумеем адно аднаго, а кіраўнікі дзяржаваў даюць нам важны знак, паставіўшы высокую планку – дасягнуць павышэння таваразвароту да $ 8 млрд бліжэйшым часам. Але яшчэ гэта пытанне і міжрэгіянальнай супрацы».
Ён таксама дадаў, што Беларусь – пяты эканамічны партнёр Украіны. Пры гэтым паводле колькасці супольных прадпрыемстваў «ні з адной іншаю краінаю няма такой кааперацыі»: «Сёння мы будзем гаварыць не пра палітыку, а пра тое, як развіваць гандлёвыя стасункі».
Старшыня Беларускай гандлёва-прамысловай палаты Уладзімір Улаховіч заявіў, што сёлета Кансультатыўная рада працуе ў кантэксце візіту прэзідэнтаў. «Гэта вельмі сур’ёзнае падтрыманне для развіцця нашых дзелавых праектаў».
Вялікая заля Жытомірскай абласной рады. Фота belsat.eu
Паводле Улаховіча, на форуме рэпрэзентаваныя 70 узораў беларускай прадукцыі розных сфераў, а таксама 18 узораў прадукцыі супольнай вытворчасці. Сярод іх – шасі МАЗ, якія вырабляюцца ва Украіне.
Захоўваем братэрскія стасункі
«Праблемы, канечне, ёсць. І асноўная праблема – у рознай скіраванасці нашых эканомік. Аднак мы захоўваем братэрскія адносіны, нягледзячы на вятры, якія часам узнікаюць», – заявіў старшыня БелГПП Улаховіч.
З прывітальным словам выступілі амбасадар Украіны ў Беларусі Ігар Кізім і пасол Беларусі ва Украіне Ігар Сокал. Кізім абвясціў, што неўзабаве ў Віцебску будзе адкрытае ганаровае консульства Украіны, якое будзе мець на мэце ў тым ліку актывізацыю бізнес-кантактаў.
Мікалай Ладуцька на Форуме рэгіёнаў у Жытоміры. Фота belsat.eu
Беларускі дыпламат у сваю чаргу заявіў, што адметныя рысы дачыненняў дзвюх краінаў – «стабільнасць і прадказальнасць».
«Калі мы для вас пятыя, то вы для нас – другія. Нягледзячы на песімістычныя прагнозы, супраца не згортваецца, а толькі актывізуецца. Са студзеня да жніўня 2019 года таваразварот склаў $ 3,8 млрд, павялічыўшыся на 4 % у параўнанні з аналагічным папярэднім перыядам», – сказаў Сокал.
Амбасадар дадаў, што беларускі прамысловы комплекс ужо закупіў ва Украіне матэрыялы ды сыравіну на $ 100 млн і «ёсць тэндэнцыя да павелічэння гэтай лічбы».
Форум рэгіёнаў, Жытомір, Украіна. Фота belsat.eu
Па выніках паседжання бакі заключылі дзясяткі дамоваў на агульную суму больш за $ 500 млн. Напрыклад, завод «Амкадор» падпісаў пастаўку 14 адзінак тэхнікі, якая адбудзецца ўжо ў гэтым месяцы на ўмовах лізінгу. Аднак гэта не толькі традыцыйная сфера машынабудаўніцтва ды нафтахіміі, але таксама і лёгкая прамысловасць. Гэтак, арганізацыі «Белкаапсаюзу» запрапанавалі паставіць ва Украіну 25 відаў харчовай прадукцыі.
Палітычныя пытанні ў Жытоміры будуць абмяркоўваць заўтра. Фота belsat.eu
Заўтра ў Жытоміры ў межах Форуму рэгіёнаў Беларусі і Украіны мае адбыцца сустрэча кіраўнікоў дзяржаваў – Аляксандра Лукашэнкі ды Уладзіміра Зяленскага.
Кацярына Андрэева, фота Ірына Арахоўская belsat.eu