У розных гарадах Казахстану прайшлі масавыя затрыманні ўдзельнікаў пратэставых акцыяў, паведамляе радыё «Азаттык».
Да правядзення пратэставых акцыяў у казахстанскіх гарадах заклікалі ініцыятыўная група па стварэнні Дэмакратычнай партыі на чале з Жанбалатам Мамаем і рух «Дэмакратычны выбар Казахстана», створаны былым банкірам Мухтарам Аблязавым, які жыве за мяжой. Позва мітынгаў – крэдытная амністыя, вызваленне палітвязняў, забарона продажу зямель замежнікам.
Удзельнікі акцыяў пратэсту скандавалі «Стары, сыходзь!», «Назарбаеў, сыходзь!», «Парламенцкая рэспубліка!».
Санітарныя лекары Алматы і Нур-Султану выступілі з засцярогамі ад удзелу ў масавых сходах, патлумачыўшы гэта «павышэннем рызык заражэння». Генеральная пракуратура ў сваім папярэджанні таксама спасылалася на каранцін.
У розных частках Алматы 6 чэрвеня затрыманыя больш як сотня людзей. Затрыманні таксама прайшлі ў Шымкенце, Семеі, Актабе, Уральску і Кызылардзе.
Колькі чалавек затрымалі агулам, невядома, але, паводле падлікаў журналістаў, лік можа ісці на некалькі сотняў.
Міжнародныя праваабарончыя арганізацыі раней неаднаразова выказвалі занепакоенасць тым, што казахстанскія ўлады, скарыстаўшыся каранцінам, абмяжоўваюць правы і свабоды і ўзмацняюць ціск на актывістаў. Арганізацыя «Human Rights Watch» заявіла, што меры рэагавання на пандэмію каронавіруса выходзяць за рамкі мэтазгодных, а каранцінныя меры ўводзіліся спосабамі, якія часам выяўляліся «адвольнымі і несуразмернымі».
МГ belsat.eu