«Нас літаральна вышпурнулі». Мянчук распавёў, як 10-ы шпіталь пільна выпісвае хворых з пнеўманіяй
Беларускія медустановы вяртаюцца да працы ў штатным рэжыме. Паводле Міністэрства аховы здароўя, больніцы вызваляюцца на падставе аналізу захворвання на каронавірус па рэгіёнах. Гэтак, 10-ы шпіталь Менску завяршыў прыём пацыентаў з COVID-19. Пра гэта паведамляюць дактары і пацыенты лякарні. Актывіст і былы актор Свабоднага тэатру Кірыл Машэка распавёў, як яго ды іншых пацыентаў пульманалагічнага аддзялення літаральна выгналі са шпіталю з недалечанай пнеўманіяй.
Мастак Кірыл Машэка захварэў на каронавірусную інфекцыю напрыканцы чэрвеня. Яго прызналі кантактам 1-га ўзроўню і адправілі ў 10-ы шпіталь Менску. Мазок на наяўнасць COVID-19 быў адмоўны, КТ паказала двухбаковую пнеўманію вярховых доляў. Тэсту на антыцелы ў лякарні не было.
Кірыла паклалі ў пульманалагічнае аддзяленне на 5-м паверсе. Хлопец кажа, што туды прывозілі ўсіх, хто чакаў вынікаў мазка.
«Мне здалося, што гэта нібы перавалачны пункт. Калі паступіў у палату, быў сам. Пазней прывезлі мужчыну, ён адразу сказаў, што ў яго ўся сям’я хварэе каронавірусам. Мяне праз гадзіну перавялі ў іншую да пацыентаў, у каго вынік аналізу быў адмоўны».
Лячылі Кірыла гэтак сама, як і астатніх: давалі антыбіётыкі, ставілі кропельніцы. Да дактароў і медсёстраў ён прэтэнзіяў не мае. Хлопца ўразіла, што знянацку 1 ліпеня ў аддзяленні пачалася паніка, санітары прыбеглі дэзынфікаваць палаты, літаральна вырываючы прасціну з-пад хворых.
«Падняўся так званы кіпіш, усё мылі, пераварочвалі, здымаючы матрацы і бялізну. Доктар прыйшоў і проста сказаў, што ўсе выпісаныя. У адной палаце бабуля засталася сам-насам. Нам спачатку казалі, што перавядуць у іншы шпіталь далячыць пнеўманію, але тут такое».
Мянчук заўважае, што з больніцы брыгады хуткай дапамогі пільна вывозілі пацыентаў, хто, на ягоную думку, не мог дабрацца дадому самастойна. Кірыл кажа, што мог бы настаяць на шпіталізацыі ў іншую лякарню, але пастанавіў далечвацца ўдома.
«Там не сказаць, што жахлівая сітуацыя, але абстаноўка напружаная. Ніхто нікому нічога не кажа, усе маўчаць. Відаць, што дактары самі незадаволеныя. Мяркую, ім паступіў загад, і яны робяць, што могуць. Але ж падыдзіце і скажыце нармальна ў твар, што і як, бо ў некаторых пачалася паніка, істэрыка. Уначы чуў, як хтосьці прасіў ШВЛ, але сказалі, што без вострай неабходнасці не дадуць. Хаця вольны апарат стаяў на калідоры».
Цяпер Кірыл Машэка ўдома. Яму выпісалі курс антыбіётыкаў на 5 дзён. Хлопец кажа, што яму дазволілі выходзіць выкінуць смецце, у бліжэйшую краму і аптэку.
«Адчуваю слабасць, ёсць кашаль, пад вечар тэмпература. Вось такі каранцін. Выглядае так, што праз сем дзён мушу зрабіць аналіз крыві, тэсту на вірус не трэба рабіць, хаця галоўны доктар сказаў, што павінны зрабіць другі».
Галоўны доктар 10-га шпіталю размаўляць з журналістамі адмовіўся. Ягоная сакратарка адказала, што Віктар Ісачкін пытанні па тэлефоне не абмяркоўвае, і параіла звяртацца ў Міністэрства аховы здароўя. З прэс-сакратаркай ведамства Юліяй Барадун звязацца не ўдалося.
Згодна з афіцыйнымі звесткамі, паводле стану на 2 ліпеня ў Беларусі каронавірус выяўлены ў больш як 62 тысячаў чалавек, каля 400 памерлі. Міністэрства аховы здароўя заяўляе, што каронавірус «адступае».
Калі вы працуеце ў сферы аховы здароўя і хочаце падзяліцца сваёй гісторыяй з нашым тэлеканалам – дасылайце паведамленні на электронны адрас belsat.eu@gmail.com або праз сацсеткі.
Чытайце таксама:
- Ці хопіць грошай на надбаўкі медыкам? Адказваюць чыноўніца і эканамістка
- «Лепш бы нарадзіла яшчэ раз, чым каронавірус». Берасцейка пра хворых АМАПаўцаў і дзясяткі трупаў у мяхах
- Загадчыца заслаўскай паліклінікі: за дзень – па 16 выпадкаў каронавіруса
- «Ніхто з нас не верыць у афіцыйныя лічбы». Фельчар хуткай пра статыстыку, прэміі і захварэлых пасля параду
- Медык з Воршы: Большасць нашых злягла з COVID-19, а даплаты ўсцяж не належыцца
- «Як можна дзяліць, хто варты даплаты, а хто – не?» У Бабруйску пратэставалі фельчары і кіроўцы хуткай дапамогі
- «Ганьба – ісці і даказваць». Высвятляем, чаму не ўсе медыкі атрымалі даплаты за каронавірус
- У Бабруйску звольнілі галоўнага лекара станцыі хуткай дапамогі, дзе пратэставалі медыкі
- «Медсёстры плачуць ад стомы. На нас усім напляваць»: фельчар пра каронавірус у Салігорску
Дар’я Курачкіна belsat.eu
