Галоўны доктар Столінскага раённага цэнтру гігіены і эпідэміялогіі Антон Маджара ў інтэрв’ю belsat.eu заявіў, што выпадкаў заражэння жыхароў раёну сібірскай язваю не выяўлена.
Нагадаем, 10 жніўня ў Столінскім раёне Берасцейскай вобласці ветэрынары выявілі захворванне каня на сібірскую язву. Жывёла належала жыхару вёскі Хотамель. Труп загінулага каня спалілі.
«У людзей нічога не выяўлена. На дадзены момант у двух вёсках нашая служба і ўстановы аховы здароўя праводзяць усе неабходныя захады для таго, каб папярэдзіць распаўсюджванне дадзенага захворвання», – паведаміў ён.
Паводле Маджара, у падобны комплекс мераў уваходзіць адбор пробаў глебы і травы, першасны агляд чалавека, прызначэнне антыбіётыкаў у якасці прафілактыкі ды інш.
Сібірская язва – асабліва небяспечная бактэрыяльная інфекцыйная хвароба. Пераважна паражае скуру. У асноўным на яе хварэюць траваедныя жывёлы – буйная і дробная рагатая жывёла, коні, вярблюды, свінні. Але таксама ёсць выпадкі захворвання людзей.
У апошнія гады сібірская язва ў Беларусі рэгіструецца ў выглядзе адзінкавых выпадкаў.
ІІ belsat.eu
