Расейскія мытнікі затрымалі ў Пскоўскай вобласці дзевяць фураў з амаль 104 тонамі леташніх яблыкаў з Польшчы і іншых краінаў (паходжанне некаторай садавіны не ўдалося ўсталяваць). Кіроўцы везлі іх у Расею з тэрыторыі Беларусі ляснымі сцежкамі.
Садавіну перамяшчалі з тэрыторыі Беларусі ў Расею без суправаджальных дакументаў, падае прэсавая служба Паўночна-заходняга ўпраўлення Федэральнай мытнай службы Расеі.
Затрыманне грузавікоў праводзілася пры сілавым падтрыманні атраду хуткага рэагавання Пскоўскай мытні.
Пасля гэтага груз знішчылі ў прысутнасці службовых асобаў федэральных кантрольных органаў.
Агулам было знішчана 103,5 тоны яблыкаў коштам каля $ 80 000.
ДД belsat.eu