Паводле кіраўніка Беларусі, найважнейшае для Беларусі – не змяншаць хуткасць і ня адхіляцца ад абранага шляху.
«Галоўнае – не змяншаць хуткасць і ня адхіляцца ад абранага намі шляху, – сказаў прэзідэнт. – Нас шмат, але Беларусь у нас адна. І гэтая простая ісціна ляжыць у аснове дзяржаўнага суверэнітэту і незалежнасці краіны», – заявіў Аляксандр Лукашэнка падчас прыёму напярэдадні старога Новага году, на якім раздаў узнагароды і дыпломы беларускім чыноўнікам, артыстам і працаўнікам дзяржаўных медыяў.
У сваёй прамове Лукашэнка параўнаў сучасны свет з акіянам, які штарміць.
«Беларусь у ім хоць і не самы вялікі, можа быць, і невялікі, але даволі моцны карабель, які мы павінны захаваць», – працягнуў ён.
Гэты год, на думку кіраўніка краіны, стане «па-свойму асаблівым».
«Ён будзе такім, якім мы яго з вамі зробім. Трэба толькі, як і раней, шанаваць і берагчы тое, што маем, захоўваць і развіваць лепшае, распрацоўваць і ствараць самае перадавое. У адваротным выпадку адстанем. А згуртаванасць, нашая любоў да Радзімы шматкроць прымножаць нашы сілы для новых дасягненняў», – дадаў Лукашэнка.
ДД belsat.eu