Міжнародны трыбунал ААН па марскім праве на сваім паседжанні 25 траўня ў нямецкім Гамбургу абавязаў Расею неадкладна вызваліць два ўкраінскія вайсковыя караблі і дапаможнае судна і 24 украінскіх маракоў, затрыманых у Керчанскай пратоцы ў лістападзе 2018 года.
Таксама трыбунал патрабуе дазволіць вярнуцца затрыманым на радзіму. Такім чынам, патрабаванні Украіны былі задаволеныя. Расея ж адмовілася ўдзельнічаць у пасяджэннях трыбуналу.
Суд таксама абавязаў РФ устрымацца ад любых дзеянняў, якія могуць пагоршыць канфлікт з Украінай праз затрыманне караблёў і маракоў.
Нагадаем, 25 лістапада тры караблі ваенна-марскога флоту Украіны (браніраваныя катары «Нікапаль» і «Бярдзянск», а таксама рэйдавы буксір «Яны Капу») планавалі зрабіць пераход з Адэсы ў Марыупаль. Хаця Азоўскае мора і Керчанская пратока з’яўляюцца ўнутранымі водамі Украіны і Расеі, дзе гандлёвыя і вайсковыя караблі карыстаюцца свабодаю суднаходства, расейскі бок не прапусціў украінскіх караблёў.
Расейцы абвінавацілі ўкраінцаў у парушэнні дзяржаўнай мяжы і «небяспечным манеўраванні». Пагранічны катар аховы «Дон» наўмысна пратараніў «Яны Капу», а ўваход у Керчанскую пратоку быў фізічна заблакаваны сухагрузамі. Да месца здарэння Расея накіравала вайсковае падмацаванне, у тым ліку баявыя верталёты. Паколькі ўкраінскіх караблёў не прапускалі ў Азоўскае мора, таму яны павярнулі назад у Адэсу.
Але расейцы пераследавалі ўкраінцаў у нейтральных водах, патрабавалі спыніцца і ў выніку адкрылі агонь на паражэнне. «Нікапаль», «Бярдзянск» і «Яны Капу» былі захопленыя і адпраўленыя ў Керч. Некалькі ўкраінскіх маракоў атрымалі раненні, 24 чалавекі былі захопленыя ў палон.
МГ belsat.eu