Украінская дэлегацыя 11 чэрвеня наведала Беларусь, каб абмеркаваць паглыбленне ўкраінска-беларускай супрацы. Пра гэта паведамілі ў офісе прэзідэнта Украіны.
Падчас рабочай паездкі кіраўнік Адміністрацыі прэзідэнта Украіны Андрэй Ярмак абмеркаваў са сваім беларускім калегам Ігарам Сергіенкам запланаваны на кастрычнік візіт прэзідэнта Украіны Уладзіміра Зяленскага ў Беларусь. Яны выказалі надзею, што эпідэмічная сітуацыя не перашкодзіць удзелу кіраўнікоў дзвюх краін у трэцім Форуме рэгіёнаў Украіны і Беларусі, які пройдзе ў Горадні.
Суразмоўцы адзначылі добрую дынаміку тавараабароту дзвюх краін і выказалі надзею, што пандэмія не будзе мець істотнага негатыўнага ўплыву на двухбаковую эканамічную супрацу. Яны таксама абмеркавалі супрацу ў сферы інфраструктуры.
Сергіенка назваў значным поспехам аднаўленне транзіту нафты праз Украіну на Мазырскі НПЗ вясной гэтага года і выказаў упэўненасць, што працяг такой супрацы дапаможа ўмацаваць энергетычную бяспеку Беларусі.
А Ярмак падзякаваў Менску за наданне перамоўнай платформы для працы Трохбаковай кантактнай групы па мірным урэгуляванні сітуацыі на Данбасе.
Ярмак і Сергіенка падрабязна абмеркавалі пытанні барацьбы дзвюх краін з каронавірусам і выказалі надзею, што ўрады змогуць звесці да мінімуму ўплыў пандэміі на двухбаковую эканамічную супрацу.
Падчас візіту адбыўся шэраг сустрэч з чальцамі новага ўраду Беларусі «для падтрымання высокай інтэнсіўнасці двухбаковых кантактаў». Гэтак, віцэ-прэм’ер-міністр Украіны – міністр рэінтэграцыі часова акупаваных тэрыторыяў Аляксей Рэзнікаў сустрэўся з намеснікам прэмʼер-міністра Беларусі Юрыем Назаравым, а міністр абароны Украіны Андрэй Таран – з міністрам абароны Беларусі Віктарам Хрэніным.
МГ belsat.eu
