Рэалізацыя праекту газаправода «Паўночная плынь-2 стане моцным ударам па дыверсіфікацыі і бяспецы энергазабеспячэння Еўропы. Такую думку выказаў міністр энергетыкі ЗША Рык Пэры падчас свайго візіту ў Літву, піша DW.com.
«Гэты газаправод павысіць уплыў Расеі на еўрапейскую вонкавую палітыку і слабасць Еўропы ад перабояў забеспячэння», – адзначыў Рык Пэры.
Паводле яго словаў, дзякуючы «Турэцкай плыні» і «Паўночнай плыні-2» Масква ўжо ў наступным годзе спыніць транзіт энергасыравіны праз Украіну. Пры гэтым міністр энергетыкі заклікаў Еўропу набываць газ у ЗША.
«Паўночная плынь – 2» («Nord Stream 2») – праект магістральнага газаправоду з Расеі ў Нямеччыну праз Балтыйскае мора. Праект мусіць быць завершаны ў наступным годзе. Але пакуль будаўніцтва прыпыненае з прычыны нязгоды Даніі на пракладку газаправода праз свае тэрытарыяльныя воды.
Пры гэтым як палітыкі, так і эксперты пагаджаюцца ў меркаванні, што расейскі праект «Паўночная плынь-2» не акупіцца з фінансавага пункту гледжання. Таму рэалізоўваюць яго нібыта дзеля таго, каб пакараць украінцаў пазбаўленнем транзіту і даць магчымасць нажыцца падрадчыкаў, якія яго будуюць.
СК belsat.eu
