У сваіх прагнозах росту беларускай эканомікі міжнародныя эксперты ўлічваюць песімістычныя сцэнары. Пра гэта ў эфіры тэлеканалу «Беларусь 1» заявіў міністр эканомікі Дзмітрый Круты.
«Яны [міжнародныя эксперты. – Рэд. Belsat.eu] бяруць самыя негатыўныя, песімістычныя сцэнары, улічваючы, што ў нас на наступным год пакуль няма пагадненняў па цане на газ і па пытанні кампенсацыі падатковага манеўру», – заявіў кіраўнік Міністэрства эканомікі.
Дзмітрый Круты адзначыў, што на мінулым тыдні ў Беларусі працавала місія МВФ. Бакі абмяняліся звесткамі пра параметры грашова-крэдытнай, фінансавай сферы, макраэканамічныя паказнікі.
«Думаю, у іх будзе ў бліжэйшы час апублікаваная больш узважаная ацэнка пра рось нашай эканомікі», – лічыць міністр.
Кіраўнік Беларусі падпісаў указы № 401 і 402, якімі зацвердзіў параметры прагнозу сацыяльна-эканамічнага развіцця і асноўныя напрамкаў грашова-крэдытнай палітыкі краіны на 2020 год. Ключавымі паказнікамі эфектыўнасці работы ўрада на наступны год названыя рост ВУП на 2,8 %, экспарту тавараў і паслугаў – на 3,6%, рэальных наяўных грашовых даходаў насельніцтва – на 2,4%.
Міжнародны валютны фонд (МВФ) і Еўразійскі банк развіцця (ЕАБР) прагназуюць запавольванне эканамічнага росту Беларусі. Гэтак, МВФ у абноўленым 15 кастрычніка прагнозе рэзка пагоршыў прагноз росту ВУП Беларусі ў 2020 годзе – да 0,3 % з 2,2 %. У параўнанні з красавіцкім аглядам таксама зніжана ацэнка росту беларускай эканомікі ў 2019 годзе – з 1,8 % да 1,5 %.
МГ belsat.eu
