Кіраўнік польскага вонкавага палітычнага ведамства ў інтэрв’ю TVN24 раскрыў новыя аргументы скарачэння фінансавання «Белсату». У той жа час дырэктар каналу ўсцяж не атрымала афіцыйнага дакументу ў справе памеру датацыяў.
У чацвер тэлеканал TVN24 запытаў міністра замежных справаў Польшчы Вітальда Вашчыкоўскага, ці ўрад мае намер скласці «Белсат» у ахвяру дачыненняў на лініі Варшава–Менск.
«Нічога пра гэта не ведаю, – адказаў Вашчыкоўскі. – Польскі ўрад – не ўладальнік «Белсату», і я – не ўладальнік, а толькі адзін з донараў».
На пытанне пра скарачэнне фінансавання з боку МЗС, заявіў, што «не хачу, але мушу – як казаў класік».
Раней у інтэрв’ю часопісу Wprost міністр заяўляў, што абмежаванне вяшчання «Белсат» было б часткаю дамовы з беларускімі ўладамі.
Аднак сёння кіраўнік польскага МЗС патлумачыў, што гэта абумоўлена міжнароднай сітуацыяй і каштоўнымі выклікамі, якія стаяць перад польскай дыпламатыяй. Сярод іх Вашчыкоўскі назваў стварэнне новых кансулатаў, тэлефоннага цэнтру для палякаў, якія жывуць у Вялікай Брытаніі або павелічэнне дапамогі для сірыйскіх уцекачоў на Блізкім Усходзе.
«Цяпер мы абмяжоўваем толькі датацыі, але мы не ўладальнікі «Белсату». «Белсат» мае магчымасць правесці рэформы, можа шукаць іншых донараў – у польскім урадзе або ў бізнесе, а таксама донараў за мяжой. Мы не можам вырашаць лёс «Белсату», – заявіў Вашчыкоўскі.
Апроч гэтага міністр дадаў, што беларускія ўлады паабяцалі пусціць у краіне польскія тэлеканалы «Палонія» і «Культура».
Аднак, нядаўна прэсавы сакратар беларускага МЗС Дзмітрый Мірончык абвесціў, што беларускія ўлады толькі збіраюцца правесці аналіз магчымасці ўключэння польскага тэлебачання ў пакет беларускіх кабельных сетак.
Барацьба за існаванне «Белсату» працягваецца.
КБ, ДД