Новы настаўнік сталічнага клубу Андрэй Сідарэнка правёў першы трэнінг з «зубрамі» напярэдадні заўтрашняй сустрэчы з чэлябінскім «Трактарам».
Пасля заняткаў, якія цягнуліся адну гадзіну, трэнер прызнаўся, што фізічны стан гульцоў пакідае жадаць лепшага, таму клуб актыўна шукае новых гульцоў.
«Выправіць гэта ў бліжэйшы час вельмі складана, так што зыходзім з таго, што маем. Пакуль у нас даволі абмежаваная абойма гульцоў, таму патрэбныя навічкі», – заявіў Сідарэнка.
Цяпер галоўная задача каманды, па словах Сідарэнкі, – палепшыць якасць гульні.
У размове з прэсавай службай хакеісты заявілі, што дадуць рады.
«Думаю, хутка з усім справімся, – сказаў нападнік клубу Ілля Літвінаў. – Нашая задача – выйсці і паказаць упэўненасць, злосць, выявіць характар. Думаю, мы «парвем» гэты «Трактар» на радасць гледачам! Трэба і, каб у новага трэнера быў удалы дэбют.
Літвінаў дадаў, што на карысць камандзе пойдзе тое, што новы трэнер – рускамоўны.
«Гэта можа пайсці на карысць, бо пераклад часам не заўсёды на 100 % перадае арыгінал», – дадаў Літвінаў.
11 лістапада новым галоўным трэнерам «Дынама» стаў Андрэй Сідарэнка, які з ліпеня таксама ўзначальвае хакейную зборную Беларусі.
У «Дынама» Сідарэнка змяніў Гордзі Дўаера, якога звольнілі 9 лістапада разам з усімі асістэнтамі.
У трэнерскі штаб сталічнага клубу ўвайшлі Андрэй Кавалёў і Дзмітрый Краўчанка.
ДД