Пасля планавых медаглядаў медыкі будуць інфармаваць УУС пра факты палавога жыцця школьніц, якім няма 16-ці гадоў.
Пра гэта 15 лютага паведаміў на калегіі галоўнага ўпраўлення адукацыі начальнік аддзелу па супрацьдзеянні гандлю людзьмі УУС Менаблвыканкаму Яўген Дубаневіч, піша Белапан.
Адказваючы на пытанне педагогаў пра факты гутаркі навучэнцаў са следчымі пасля медагляду ў адным з ліцэяў Менскай вобласці, Дубаневіч пацвердзіў: такія гутаркі праводзіліся і не раз.
Ён растлумачыў, што гэта робіцца дзеля таго, каб выяўляць злачынствы супраць палавой недатыкальнасці няпоўнагадовых. Вядзецца пра артыкул 168 КК «Палавыя зносіны і іншыя дзеянні сексуальнага характару з асобай, якая не дасягнула шаснаццацігадовага ўзросту».
«Мы пастаянна вядзем дыскусіі з Міністэрствам аховы здароўя вакол гэтага пытання і спрабуем выпрацаваць агульную пазіцыю. І дамагліся свайго ў частцы, што датычыцца медычнай таямніцы. Калі вядзецца пра дзяўчынку 14-15 гадоў, то здзейснена злачынства, і ўрачэбная таямніца тут не працуе», – сказаў Дубаневіч.
Паводле яго словаў, медагляды дзяўчынак да 16 гадоў будуць праводзіцца штогод, і калі выявіцца, што дзяўчынка мела палавую сувязь, гінеколаг абавязаны паведаміць пра гэта наўпрост начальніку мясцовага УУС, каб інфармацыя не трапіла недзе яшчэ і не было грамадскага ганьбавання. Дзяўчынку накіруюць да медычнага псіхолага, які падрыхтуе яе да зносінаў са следчымі.
«Тады ўжо будзем гутарыць з дзяўчынкай, пытацца, чаму гэта здарылася, з кім. Добра, калі гэта па каханні з хлопчыкам. Нікога яшчэ за гэта не пасадзілі. Але бываюць выпадкі, што дзяўчынка апынулася ахвярай гвалту. Яна ў сілу свайго ўзросту пабаялася пра гэта каму-небудзь сказаць», – растлумачыў Дубаневіч.
Ён адзначыў, што «пад адзін грабянец усіх прычэсваць нельга, але па ўсіх выяўленых выпадкаў будзе праводзіцца правяранне».
«Пра такія працы і размовы будзе паведамляецца законным прадстаўнікам няпоўнагадовай. Ніхто самое дзіця на размову не павядзе», – запэўніў Дубаневіч.
Прадстаўнік УУС падкрэсліў, што завядзенне крымінальнай справы за палавое злачынства – вельмі працаёмкі працэс менавіта паводле доказу.
«Калі па наркотыках і крадзяжах, забойстваў у нас ёсць прадмет злачынствы, то тут – словы, словы, словы. Праводзіцца мноства экспертызаў, кожнае цяжкае злачынства супраць палавой недатыкальнасці становіцца на кантроль старшыні Следчага камітэту», – паведаміў ён.
Дубаневіч параіў педагогам за гутаркай пра палавую недатыкальнасць і бяспеку «не праводзіць мяжу па палавой прыкмеце».
«Статыстыка сведчыць, што хлопчыкі і дзяўчынкі становяцца ахвярамі педафілаў у роўнай ступені», – адзначыў прадстаўнік УУС.
Ірына Турчына, БелаПАН
СК/belsat.eu