Медыкаў, што дапамагалі пацярпелым ў выбуху пад Северадзвінскам, не папярэдзілі аб радыяцыі. У аднаго з лекараў знайшлі цэзій-137

У аднаго з лекараў Архангельскага абласнога шпіталю, што дапамагаў пацярпелым у выбуху на сакрэтным вайсковым аб’екце ў паселішчы Нёнакса, знайшлі ў арганізме радыеактыўны нуклід цэзій-137. Пра гэта паведамляе «The Moscow Times».

Калі ў шпіталь даставілі пацярпелых у выбуху на сакрэтным вайсковым аб’екце, лекараў не папярэдзілі, што трагічнае здарэнне было звязанае з радыяцыяй. «Гаворка пра тое, што быў радыёактыўны пыл. Людзей ніхто не папярэдзіў аб заражэнні першапачаткова. Усе, хто там быў на той момант, ратавалі пацярпелых. З іншых аддзяленняў запрашалі лекараў на кансультацыю», – распавяла агенцтву «Северные новости» крыніца ў архангельскім шпіталі.

«Як кажуць нашыя калегі, у момант, калі прывезлі пацярпелых у Нёнаксе, медыкі не былі папярэджаны, што гэта заражаныя людзі. Толькі праз некаторы час ім далі свінцовыя фартухі, але гэта ўжо была не абарона. Людзі перажываюць», – распавяла адна з медыкаў.

Крыніца «Северных новостей» сцвярджае, што на абследаванне ў Маскву накіравалі каля 50 медыкаў з Архангельску. Паводле «The Moscow Times», прынамсі ў аднаго з лекараў у арганізме знайшлі радыеактыўны нуклід цэзій-137. Выкід цэзію-137 у навакольнае асяроддзе адбываецца ў асноўным выніку ядравых выпрабаванняў і аварыяў на прадпрыемствах атамнай энергетыкі.

Паводле журналістаў, усе медыкі, хто кантактаваў з пацярпелымі ад выбуху, падпісалі дакумент аб неразгалошванні – на гэтым настойвалі працаўнікі ФСБ.

«Іх не прымушалі падпісваць, але калі трое агентаў ФСБ прыходзяць са спісам і просяць падпісаць, ім мала хто скажа не», – цытуе аднаго з лекараў «The Moscow Times».

• Выбух сакрэтным вайсковым аб’екце ў паселішчы Нёнаксаа, што за 40 км ад Северадзвінску Архангельскай вобласці, адбыўся 8 жніўня. Мінабароны Расеі паведаміла пра двух загінулых. Пасля здарэння прэс-служба адміністрацыі Северадзвінску заявіла аб «кароткачасовым павышэнні радыяцыйнага фону». Праз павышэнне радыяцыйнага фону ў Архангельску і Северадзвінску мясцовыя жыхары раскупілі ўвесь ёд. У Расгідрамет заявілі, што 8 жніўня ў Северадзвінску магутнасць дозы гама-выпраменьвання была перавышаная ў 4-16 разоў у параўнанні з фонавымі значэннямі.
• Пазней стала вядома, што ад выбуху загінулі пяць працаўнікоў дзяржаўнай карпарацыі «Расатам». Яшчэ трое атрымалі траўмы і апёкі рознай ступені цяжкасці. У карпарацыі адзначылі, што здарэнне адбылося «пры выпрабаванні вадкаснай рэактыўнай рухальнай устаноўкі» ў перыяд працаў, «звязаных з інжынерна-тэхнічным суправаджэннем ізатопных крыніцаў харчавання на вадкаснай рухальнай устаноўцы».
• Эксперты ставяць пад сумнеў афіцыйную версію выбуху на сакрэтным вайсковым аб’екце ў паселішчы Нёнакса. Яны адзначаюць, што выбух вадкаснай рэактыўнай рухальнай устаноўкі не мог прывесці да радыяцыйнага выпрамянення. Адмыслоўцы падазраюць, что выбух і выпраменьванне радыяцыі стала вынікам аварыі падчас выпрабаванняў крылатай ракеты з ядравай устаноўкай. Імаверна, гаворка ідзе пра ракету 9М730 «Буревестник» (NATO пазначае яе як SSC-X-9 Skyfall).

ІІ belsat.eu