Медычны працаўнік распавёў нам пра сітуацыю ў Смаргоні і раённым шпіталі. Месцаў у ЦРБ не хапае, ёсць хворыя медыкі і смерці.
У рэдакцыю Belsat.eu звярнуўся медычны супрацоўнік Цэнтральнай раённай больніцы Смаргоні. На ўмовах ананімнасці ён распавёў, што зараз адбываецца ў лякарні і якім чынам падтрымлівае кіраўніцтва сваіх супрацоўнікаў.
«Успышка была ў асноўным на трактарным заводзе. Усё пачалося, калі ў нас ляжалі расейцы. Тыдні тры таму гэта ўсё перайшло на трактарны завод. Адтуль вельмі шмат хворых, – распавядае супрацоўнік Смаргонскай ЦРБ. – На хуткай дапамозе выявілі каронавірус у двух чалавек. Праз тыдзень яшчэ 12 чалавек выявілі, якія кантактавалі з імі. Вось гэтыя 12 чалавек сядзяць на ізаляцыі. Хтосьці з сімптомамі, хтосьці без сімптомаў, але ў шпіталь нікога не забіралі. Усе сядзяць па дамах. Некаторыя здавалі тэсты, яшчэ не ведалі вынікаў, але ўсё адно ім трэба было хадзіць на працу».
Паводле суразмоўцы, калі кантакты першага ўзроўню здавалі тэсты, то іх запісвалі ў кантакты другога ўзроўню, хоць яны і працуюць з інфікаванымі наўпрост:
«Хто нам што распавядзе? У аўторак ізноў павінны былі браць мазкі ў тых, хто кантактаваў з работнікамі хуткай дапамогі, але зверху прыйшло ўказанне: работнікаў хуткай дапамогі не абследаваць. Толькі тых, у каго пацверджаны каронавірус, хто сядзіць дома на ізаляцыі. Тыя, у каго праявіліся сімптомы, папросту пайшлі на бальнічны, ніхто ніякіх мазкоў не браў. Сказалі, што тэмпература пройдзе, становішча палепшыцца, на чыстую зону – за бальнічнымі».
Супрацоўнік ЦРБ кажа, што ў горадзе склалася цяжкая сітуацыя:
«Ведаю, што практычна з кожнай вуліцы прывозяць людзей. Нягледзячы на тое, што работнікі на ізаляцыі, яны павінны прыйсці ў інфекцыйны кабінет і здаць там [тэст. – Belsat.eu]. Не паспяваюць ездзіць, не спраўляюцца. Раней усіх станоўчых, у каго нават сімптомаў не было, прывозілі. Цяпер нават з сімптомамі, нават з тэмпературамі людзі сядзяць дома. Зразумела, што няма месцаў. З медыкамі таксама праблемы. У нас з вясковых пунктаў выклікаюць на дзяжурства ў прыёмны пакой, бо няма каму працаваць».
Некаторыя аддзяленні былі перапрафіляваныя:
«Вызваляліся спецыяльна чатырохпавярховыя будынкі. Адразу клалі там кантакты, цяпер там ляжаць хворыя, усё закладзена. З асноўнага будынку выселілі радзільню. Нараджаць ездзяць у Ашмяны, а ў радзільні засталася хірургія, траўматалогія і дзеці. То бок асноўны корпус таксама вызвалілі пад пнеўманіі, хворых каронавірусам».
Смерці ёсць, але дакладную колькасць наш суразмоўца не ведае:
«Шмат смерцяў няма. Праблема ў тым, што вельмі шмат хворых дзяцей. Ведаю, што як мінімум 50 было тыдзень таму. Цяпер будзе больш. У 1-ай школе пасадзілі ўвесь клас на каранцін. Вельмі шмат хворых і настаўнікаў, і дзяцей. Мне падаецца, што ўсё ж гэты вірус муціраваў, бо ў іншых краінах так не хварэлі ані дзеці, ані моладзь. Вельмі шмат маладых захварэла».
У СШ №1 Смаргоні нам адказалі, што каранціну ў школе няма, і ніякай інфармацыі журналістам даваць не будуць.
На Смаргонскім агрэгатным заводзе паведамілі, што дырэктар у камандзіроўцы і па каментар лепш звярнуцца да намесніка дырэктара па ідэалагічнай працы, кадрам і быту Аляксея Арцёмава. Але той таксама апынуўся ў камандзіроўцы. Нагадаем, апошнім разам, калі мы да яго звярталіся, ён нам адмовіў у каментары.
Намесніца галоўнага лекара Смаргонскай ЦРБ Наталля Тупека сказала звяртацца выключна да галоўнага лекара, але той не падымаў слухаўку палову дня. Мы знайшлі ў мясцовай газеце «Светлы Шлях» надаўні каментар Наталлі Тупека пра сітуацыю ў ЦРБ:
«Для лячэння пацыентаў мы не планавалі і не плануем задзейнічаць іншыя пляцоўкі, акрамя ЦРБ. Месцаў у нас у стацыянары дастаткова – і для цяжка хворых, і для хворых сярэдняй цяжкасці. Тыя, у каго каронавірус працякае ў лёгкай форме, мы лечым дома. Яны таксама пад назіраннем лекара, праходзяць усе неабходныя даследаванні, здаюць аналізы. Створаны спецыяльныя брыгады, якія наведваюць хворых на даму. І тых, у каго пацверджаны каронавірус, і хвароба працякае ў лёгкай форме. І тых, хто меў кантакт першага ўзроўню з хворымі COVID-19. А таксама тых, у каго ёсць падвышаная тэмпература. Асобныя брыгады медыкаў абследуюць дзяцей на наяўнасць каронавіруснай інфекцыі».
У Смаргоні былі размовы і пра тое, што горад збіраюцца зачыніць, але намеснік старшыні райвыканкаму Ігар Шчасны ў выданні «Светлы шлях» гэта аспрэчыў:
«Так, эпідэміялагічная сітуацыя ў нас няпростая, хворых шмат, але ўсе яны пад наглядам медычных работнікаў. Ісці на такія крайнія меры, як абмяжоўваць уезд у Смаргонь або выезд з гораду, мы не збіраемся. Такой практыкі ва ўсёй рэспубліцы няма. Ніводны горад у Беларусі не зачынены».
Наш суразмоўца, медычны супрацоўнік ЦРБ, лічыць, што інфармуюць насельніцтва дрэнна:
«Хто нам дакладную інфармацыю дасць – ніхто не дасць. Мы ж чытаем інтэрнэт, ведаем, што адбываецца. Паглядзіш нашыя навіны па Беларусі і плакаць хочацца ад таго, што народ у нас нічога не ведае. У краму прыйдзеш – нават тыя ж прадаўцы не выконваюць меры бяспекі. Мала хто ў пальчатках, масцы. У нас народ дрэнна інфармаваны. Зразумела, што ўсе баяцца. У нас папросту такая ўлада, што ні за што пасадзяць і будзеш сядзець. Ніхто ў нас ніякія паперкі не падпісваў аб неразгалошванні – гэта лухта. Папросту людзі самі баяцца».
ДЗ Belsat.eu