Хакеры ўсталявалі шпіёнскія праграмы на камп’ютары МЗС Нямеччыны, але не змаглі атрымаць доступ да дакументаў урадавай сеткі.
Мяркуецца, што за атакай стаяць хакеры з Расеі.
Пра кібератаку на ўрадавую сетку Нямеччыны стала вядома ў канцы лютага. Падчас яе хакеры не змаглі атрымаць доступ да абароненай урадавай сеткі, паведамляе 18 сакавіка выданне «Bild am Sonntag».
Паводле крыніцы са спецслужбаў, хакеры змаглі пранікнуць у серверы нямецкага міністэрства замежных справаў праз сеткавую інфраструктуру курсаў павышэння кваліфікацыі для нямецкіх дыпламатаў і ўсталяваць на камп’ютарах шкоднасныя праграмы. Аднак ім не ўдалося атрымаць доступ да сеткі за межамі гэтага злучэння. У прыватнасці, у хакераў не было доступу да дакументаў МЗС і правоў адміністратара.
У канцы лютага стала вядома пра ўкараненне невядомых кібершпіёнаў у серверы міністэрства замежных справаў і Мінабароны Нямеччыны. Пры гэтым пацярпела ўрадавая сетку Бон – Берлін, якая лічыцца добра абароненай. Ўзлом быў здзейснены ў канцы 2016 года, знойдзены ў канцы 2017-га, лакалізаваны, але пакуль не ліквідаваны.
Яго прыпісваюць хакерскай групе «APT28», вядомай таксама пад назвай «Fancy Bear», якая меркавана стаіць і за нападам на ўнутраную сетку Бундэстагу ў 2015 годзе. У ходзе гэтай кібератакі яны спампавалі парадку 17 гігабайт дадзеных. Спецыялісты лічаць, што «АРТ28» працуе пад кіраўніцтвам ГРУ Расеі.
