У пятніцу, 29 чэрвеня, Аляксандр Лукашэнка і прэзідэнты Аўстрыі і Нямеччыны наведаюць цырымонію адкрыцця мемарыялу ахвяраў нацызму ў Благаўшчыне. Акрамя цырымоніі ў Благаўшчыне, дэлегацыя разам з міністрам замежных справаў Уладзімірам Макеем наведае частку мемарыялу ля вёскі Малы Трасцянец. Сёння тут таксама актыўна добраўладкоўвалі сцежкі і газоны.
Як распавялі нам мясцовыя жыхары, падрыхтоўчыя працы зусім ім не перашкаджаюць. У малатрасцянецкім парку сем’і часта гуляюць з дзецьмі.
«Абсалютна не перашкаджае, нам бы нават цікава было паглядзець на гэтую дэлегацыю. Фактычна, адзінае месца, дзе можна пагуляць – гэта тэрыторыя комплексу. Канешне, калі да нас прыязджаюць госці, то імкнемся паказаць помнік, распавесці гісторыю», – падзялілася сваімі думкамі спадарыня з дзіцём.
Пакуль адны адпачываюць – іншыя працуюць.
Супрацоўнік «Зелянбуду» сказаў belsat.eu, што яго «папрасілі прыехаць дапамагчы», пры тым што сам ён і ягоныя калегі з іншага населенага пункту. «Пазганялі, карацей, як заўжды», – неахвотна дадае ён.
Некаторыя рабочыя ў Малым Трасцянцы ад самай раніцы і, наадварот, не бачаць праблемы ў такім графіку.
«Да восьмай вечара мусім паспець. Калі радзіма загадала – мы выканаем, а як жа інакш?».
Фота – Ірына Арахоўская, belsat.eu