Калі з надыходам восені вам захацелася чагосьці мяснога ды сытнага, вось вам рэцэпт выдатнай беларускай стравы. У дзвюх аўтарскіх версіях: сучаснай і ў тайскім стылі – ад вядоўцаў нашага тэрапеўтычнага кулінарнага тэлешоу «Я не буду гэтага есці!».
У адным з выданняў праграмы нашая шэф-кухары Вольга Прыгарава і Аляксандр Чыкілеўскі гатавалі мачанку для 12-разовага чэмпіёна свету па тайскім боксе і вакаліста гурта «Brutto» Віталя Гуркова.
Мачанка ў тайскім стылі ад Вольгі Прыгаравай
- 50 мл соусу «Піры-Піры»
- 1 пачак разрыхляльніка
- 150 мл соевага соусу
- 500 г смятаны
- бляшанка ананасаў
- 500 г балгарскага перцу
- 500 мл соусу «Чылі-світ»
- 500 г цыбулі
- 1 цытрына
- 70 г мёду
- 10 яек
- 500 г свіной шыі
- 1 кг мукі
- соль
Свініну рэжам брускамі і марынуем у мёдзе ды соевым соусе. На добра разагрэтай патэльні абсмажваем парэзаныя саломкаю цыбулю і перац, дадаем парэзаны ананас. На другой моцна разагрэтай патэльні абсмажваем свініну, пакуль яна не пачне кармелізавацца, пасля аб’ядноўваем мяса з гароднінай. Дадаем соусы «Піры-Піры» і «Чылі-світ», даводзім да кіпення.
Замешваем цеста для аладак. Узбіваем бялкі да пены, асобна – жаўткі з цукрам, у жаўткі акуратна дадаем смятану. Далікатна змешваем і дадаем бялкі. Затым паступова ўводзім муку з разрыхляльнікам, пакуль кансістэнцыя цеста не стане нагадваць смятану. На разагрэтай патэльні з алеем выпякаем аладкі з абодвух бакоў да румянай скарыначкі.
Мачанку падаем у гарнушках (гаршчочках), а аладкі – у мяшочках для аладак, каб заставаліся цёплымі.
Мачанка ад Аляксандра Чыкілеўскага
Мачанка
- каўбаса хатняя – 200 г
- рэбры свіныя – 250 г
- грудзінка вэнджаная – 50 г
- цыбуля – 50 г
- алей – 20 мл
- масла сметанковае – 70 г
- булён – 300 мл
Дранікі
- бульба – 250 г
- яйка – 1 шт.
- цыбуля – 50 г
- мука – 50 г
- соль – 5 г
Рэбры запячы да гатовасці, каб атрымалася залацістая скарыначка. Абсмажыць на алеі дробна парэзаныя цыбулю ды грудзінку. Дадаць ваду, спецыі і варыць 5-10 хв. Дадаць каўбасу і варыць да гатовасці каўбасы. Абсмажыць на сметанковым алеі муку, дадаць булён, у якім варылася каўбаса. Ўварыць і дадаць назад.
Нацерці бульбу і цыбулю на дробнай тарцы, дадаць муку і яйка, вымесіць і падсмажыць дранікі. На талерку наліць соус, на яго выкласці рабрынку, каўбасу і паліць падліўкай, побач выкласці бульбяныя бліны.
Вось тут можна ўбачыць сам працэс гатавання:
Любіце гатаваць? Сачыце за абнаўленнямі на nebudu.belsat.eu, а таксама ў Facebook, «Одноклассниках» ды Instagram.
