Кіраўнік Беларусі 1 кастрычніка падчас пасяджэння Найвышэйшага Еўразійскага эканамічнага савету ў Ерэване заклікаў заключыць пагадненне паміж ЕАЭС і Еўрапейскім Звязам.
На думку Аляксандра Лукашэнкі, такая дамова мусіць нагадваць Пагадненне аб гандлёва-эканамічнай супрацы з Кітаем, якое мусіць запрацаваць у кастрычніку. Пра гэта паведамілі ў Адміністрацыі кіраўніка дзяржавы.
Пагадненне з ЕЗ, заявіў Лукашэнка, зробіць сухапутны шлях з Кітаю ў Еўропу праз ЕАЭС найбольш прывабным.
Кіраўнік Беларусі таксама заклікаў надаць асаблівую ўвагу краінам далёкай дугі. Апроч таго, ён пазітыўна ацаніў распрацоўку часовага пагаднення аб стварэнні зоны свабоднага гандлю з Іранам, якое ўступіць у моц у кастрычніку, і пакету пагадненняў з Сінгапурам, адзначыў гатовасць заключыць дамову аб свабодным гандлі з Сербіяй.
Унутры ЕАЭС Лукашэнка заклікаў прыняць палітычнае рашэнне для ліквідацыі бар’ераў на прасторы аб’яднання, асабліва ў такіх сферах, як дзяржзакупкі. На яго думку, вартым можа быць узмацненне кампетэнцыі Еўразійскай эканамічнай камісіі і Суду ЕАЭС.
МГ belsat.eu