Лукашэнка выказаўся пра размеркаванне студэнтаў-медыкаў і галоўную задачу беларускай медыцыны
Падчас сустрэчы з выкладчыкамі і студэнтамі медычных ВНУ Аляксандр Лукашэнка заявіў, што галоўная задача беларускай медыцыны – павялічыць працягласць і палепшыць якасць жыцця грамадзянаў, перадае БелТА.
Кіраўнік дзяржавы адзначыў, што беларуская медыцына за апошнія гады дасягнула поспехаў у распрацоўцы перспектыўных метадаў прафілактыкі, дыягностыкі і лекавання хваробаў. Таксама ствараюцца новыя лекавыя сродкі і асвойваюцца перадавыя тэхналогіі.
Паводле Лукашэнкі, самы значны рэсурс – гэта медычныя кадры, таму міністэрствам неабходна звярнуць асаблівую ўвагу на фарміраванне колькасці месцаў для навучання па патрэбных спецыяльнасцях і прымаць рашэнне з улікам патрэбаў кожнага рэгіёну.
«Сёння вялікая ўвага надаецца пытанням забеспячэння выпускнікоў першым працоўным месцам. Мы, у адрозненне ад іншых краін СНД, захавалі традыцыі абавязковага размеркавання бюджэтнікаў. Наладжана сістэмная праца з выпускнікамі медычных універсітэтаў, у якой удзельнічаюць прадстаўнікі органаў мясцовай улады і патэнцыйныя наймальнікі. Не менш важныя маніторынг замацавання і адаптацыі маладых спецыялістаў на першым працоўным месцы», – сказаў Аляксандр Лукашэнка.
Ён падкрэсліў, што медычныя ўніверсітэты выбіраюць найбольш моцныя абітурыенты.
«Прахадныя балы тут штогод адны з самых высокіх у краіне. Канкурэнцыя велізарная. Так што можна з упэўненасцю сказаць: паступаюць сюды лепшыя. Гэта правільна. Выпадковых людзей сярод медыкаў быць не павінна. Як бы ні было цяжка ў вучобе, працы, гэта – пакліканне», – дадаў кіраўнік дзяржавы.
КА belsat.eu
