Лукашэнка ўзнагародзіў Кадырава і распавёў, што чачэнцы называлі ягоным імём сваіх дзяцей
Аляксандр Лукашэнка ўручыў сёння кіраўніку Чачэніі Рамзану Кадыраву ордэн Дружбы народаў, піша БелТА.
Указ аб узнагароджанні Рамзана Кадырава ордэнам Дружбы народаў Аляксандр Лукашэнка падпісаў яшчэ ў жніўні 2018 года. Сёння Кадыраў прыбыў у Менск і будзе прысутнічаць на цырымоніі адкрыцця II Еўрапейскіх гульняў. Напярэдадні ён сустрэўся з Лукашэнкам.
«Дарагі Рамзан, вітаю цябе ў роднай табе Беларусі. Няма неабходнасці распавядаць пра мае стаўленне да чачэнскага народу. Нават у складаныя часы, я ўжо часта пра гэта кажу, яны нараджалі ў нас у Берасці, маім імем называлі сваіх дзяцей. Я гэта вельмі цаню. І я нядаўна, прызначаючы міністра ўнутраных справаў, а ён у нас каўказец, распавядаў аб маіх пачуццях да каўказскага насельніцтва. Гэта сапраўды дужыя людзі, з якіх мы бярэм прыклад у пэўных момантах», – сказаў Лукашэнка.
Аляксандр Лукашэнка адзначыў, што ў яго ёсць мара калісьці пабываць у гарах Чачэніі, Дагестана і іншых каўказскіх рэгіёнаў.
«У мяне ёсць сябры. Праўда, у Інгушэціі жывуць. Але ўсё роўна гэта блізкія вам людзі. І я яму кажу: ты мяне адвязі на радзіму і пакажы вежу. Для мяне сапраўды (цікава. – заўв.) пабываць у такіх месцах без помпы, без лішніх людзей, паглядзець, што гэта за каўказскія горы, дзе жывуць мужныя людзі», – сказаў кіраўнік Беларусі.
ІІ belsat.eu
