30 чэрвеня Аляксандр Лукашэнка вярнуўся з IV Форуму рэгіёнаў у Маскве. Выступаючы з прамовай на пленарным паседжанні Форуму, кіраўнік краіны шмат гаварыў пра інтэграцыю Беларусі і Расеі.
Значныя выгады ад інтэграцыі, паводле слоў Лукашэнкі, атрымліваюць эканомікі абедзвюх краінаў.
Ён заявіў, што ў гэтым плане Беларусь і Расея «дасягнулі значных вынікаў, якіх не здолелі дасягнуць іншыя краіны ў свеце».
«Тут, можна сказаць, мы добра папрацавалі. Не дзеля ліслівасці, хачу падзякаваць кіраўнікам дзвюх верхніх палат нашых парламентаў. Яны з’яўляюцца «маторамі» інтэграцыйнага руху. Мне вельмі падабаецца іх супрацоўніцтва ў гэтым плане», – падкрэсліў Лукашэнка.
Сёння паміж урадам Беларусі і адміністрацыямі суб’ектаў РФ дзейнічаюць 70 пагадненняў. За кожным пагадненнем замацаваны план мерапрыемстваў на бліжэйшыя тры-чатыры гады.
Акрамя таго, падчас візіту Лукашэнкі ў Маскву паміж дзвюма дзяржавамі былі заключаныя кантракты на агульную суму ў 450 млн долараў. Падпісаныя дакументы, у тым ліку, аб супрацы ў сферы тонкай хіміі і касмічных тэхналогіяў.
КА, belsat.eu, паводле belta.by, president.gov.by