Кіраўнік Беларусі 23 верасня абмеркаваў са старшынём Магілёўскага аблвыканкаму Леанідам Зайцам і сваім памочнікам па Магілёўскай вобласці Міхаілам Русым працэдуру вылучэння грошай на праекты.
Аляксандр Лукашэнка падкрэсліў, што вылучэнне сродкаў магчымае толькі пасля стараннага праліку, што імі пісьменна распарадзяцца. Пра гэта паведамілі ў Адміністрацыі кіраўніка дзяржавы.
«Проста пад абяцанні грошай не будзе. Мы павінны бачыць выразны разлік. Калі вы нешта ствараеце, мы павінны бачыць, калі вернуцца гэтыя грошы», – сказаў ён.
Паводле яго, пры наяўнасці планаў вярнуць пазыкі праз 15-20 гадоў, «ніхто размаўляць не будзе». Лукашэнка дадаў, што атрыманыя грошы адразу павінны пачынаць працаваць, ісці на падаткі, вяртанне крэдытаў, заробкі людзям, вытворчасць прадукцыі і яе продаж, у тым ліку за мяжой.
«Ні ў якім разе не зыходзьце з прынцыпу «прасі больш, усё роўна дадуць менш». Не трэба так рабіць!» – заклікаў кіраўнік дзяржавы.
Лукашэнка адзначыў неабходнасць хутка вырашаць пытанні пры рэалізацыі планаў ці пры з’яўленні новых магчымасцяў. Паводле яго, мусіць быць менш бюракратыі.
Леанід Заяц, які да нядаўняга часу займаў пасаду міністра сельскай гаспадаркі, быў прызначаны старшынёй Магілёўскага аблвыканкаму пасля скандалу ў аграхолдынгу «Купалаўскае». Былога віцэ-прэм’ера Міхаіла Русага прызначылі тады ж памочнікам прэзідэнта – інспектарам па Магілёўскай вобласці.
МГ belsat.eu