Лукашэнка: Мяне папракаюць, што зладзіў мяккую беларусізацыю! Мне што, германізацыю зладзіць?
Кіраўнік Беларусі паскардзіўся на пленарным пасяджэнні II З’езду навукоўцаў на тое, што яго папракаюць «у мяккай беларусізацыі».
«Неабходна шукаць новыя формы прапаганды беларускай культуры і навукі і навучыцца рабіць гэта цікава ды займальна», – мяркуе Лукашэнка.
Паводле Лукашэнкі, «рознага роду дзеячы» нават «у роднай Расеі» не разумеюць, што адбываецца ў Беларусі.
«Мяне ў чым папракаюць? Што я ў Беларусі зладзіў мяккую беларусізацыю. Слухайце, мне што, германізацыю тут зладзіць?», – запытаўся Аляксандр Лукашэнка.
Лукашэнка назваў такі падыход «заказухаю» і параіў беларускім навукоўцам і журналістам працаваць, каб «расейцы ведалі, што адбываецца ў самай блізкай для іх краіне».
Таксама кіраўнік Беларусі паведаміў, што за 5 гадоў вытворчасць інавацыйнай прадукцыі вырасла ў два разы і паабяцаў падняць навукоўцам заробак. Адпаведны ўказ ён плануе падпісаць яшчэ ў гэтым годзе.
У з’ездзе бяруць удзел 2600 чалавек.
