Лукашэнка – міністру: Той, хто заслугоўвае па мазгаўні або па мордзе, павінен атрымаць
Кіраўнік Беларусі распавёў Юрыю Караеву, якім трэба быць міністрам унутраных справаў.
Аляксандр Лукашэнка прызначыў сёння, 11 чэрвеня, новага міністра ўнутраных справаў – ім стаў Юрый Караеў, які раней займаў пасаду намесніка міністра – камандуючага ўнутранымі войскамі. Кіраўнік краіны таксама даў некалькі парадаў міністру.
Па-першае, Лукашэнка сказаў, што важна звярнуць увагу на пытанні дысцыпліны ў органах унутраных спраў.
«Скажам шчыра, міліцыю трэба трошкі страсянуць у плане дысцыпліны. Ну а для гэтага які патрэбен чалавек – ваенны. Хаця вы адносна ваенны чалавек, вы і міліцыю добра ведаеце. Вы там былі ўнутры, вы бачылі гэтыя праблемы. А наагул, таго, чаго не ведаеце, навучыцеся», – сказаў Лукашэнка, яго цытуе прэс-служба.
Таксама Лукашэнка звярнуў увагу на асабістыя якасці новага міністра.
«Я ўвогуле не люблю нацыянальныя нейкія прыкметы падкрэсліваць, але каўказцы для мяне людзі асаблівыя. Яны і добра да мяне там ставяцца, хоць мяне ні разу, можа быць, не бачылі. Гэта дужыя людзі. І я гэты фактар не скідаю».
Нагадаем, што Юры Караеў нарадзіўся ў Асеціі.
Па-другое, Лукашэнка параіў Юрыю Хаджымуратавічу быць цвёрдым, рашучым і паважаць людзей.
«Той, хто заслугоўвае, каб яго падтрымалі і нават п’янага дадому адвезлі – так трэба і зрабіць. Той, хто заслугоўвае па мазгаўні або па мордзе, – павінен атрымаць. Усё павінна быць сумленна і справядліва, – сказаў Аляксандр Лукашэнка. – Гэта ваш прынцып працы. І дысцыпліна. Адзінае, я вас проста прашу: не заседжвацца на месцы тут, у Менску. Больш бывайце ў падраздзяленнях. Абавязкова трэба пабыць ва ўсіх абласных упраўленнях унутраных спраў. Ну і ў гарадах – буйных, раённых».
Таксама па тэме:
- Лукашэнка – новаму кіраўніку МУС: «Не трэба, як вось адбылося з цыганамі»
- Лукашэнка прызначыў кіраўніка МУС і змяніў міністра аховы здароўя
ВЯ belsat.eu
