Еўрапейскія гульні не былі стратнымі для Беларусі. А разам з Украінаю ці Расеяй нашая краіна магла правесці і Алімпійскія гульні. З такою заяваю 6 верасня ў Беларусі выступіў Аляксандр Лукашэнка, паведамляе БелТА.
Кіраўнік Беларусі заявіў, што гатовы правесці «дапусцім, з украінцамі або расейцамі» Алімпіяду. Паводле яго, у краіне ўжо гатовыя ўсе неабходныя для гэтага аб’екты, а ў суседніх краінах ёсць аб’екты, якіх не хапае ў Беларусі.
«Зараз Нацыянальны футбольны стадыён пабудуем і для водных відаў спорту, застанецца футбол. У Расеі ўся інфраструктура створаная пад футбол. Можам папросту з імі прыняць Алімпіяду», – сказаў Лукашэнка.
Ён адзначыў, што Беларусі выгадна праводзіць буйныя спартыўныя спаборніцтвы. Гэтак, паводле яго, пры правядзенні сёлета II Еўрапейскіх гульняў летам былі нават зэканомленыя сродкі.
«Мы нічога не страцілі. Толькі ў плюс», – заявіў кіраўнік краіны.
У прыватнасці, ён адзначыў карысць ад падобных падзеяў для іміджу краіны і рост колькасці турыстаў.
Паводле афіцыйных звестак, Беларусь выдаткавала на правядзенне і падрыхтоўку Еўрапейскіх гульняў 540 млн рублёў. Падчас турніру краіну наведалі 37 450 чалавек.
МГ belsat.eu
