Міністр замежных справаў Расеі Сяргей Лаўроў на прэс-канферэнцыі заверыў, што Масква не настойвае на стварэнні адзінага канстытуцыйнага акту, саюзнага парламенту і суда Саюзнай дзяржавы.
Дамова аб стварэнні Саюзнай дзяржавы ўлучае «шмат рэчаў, якія ў той час аб’ядналі і заахвоцілі яе стварыць», але час змяніўся, адзначыў Лаўроў.
Ён дадаў, што цяпер працоўная група абмяркоўвае толькі «вельмі выразныя практычныя рэчы ў сферы эканомікі і гандлю».
«Маюцца на ўвазе прадугледжаныя ў гэтай дамове дзеянні для фармавання адзінай грашовай адзінкі, адзінай грашова-крэдытнай палітыкі, падатковай палітыкі. Гэтыя рэчы наўпрост звязаныя з эканамічнымі і фінансавымі дачыненнямі ў межах Саюзнай дзяржавы».
Лаўроў зазначыў, што ў Беларусі не было рознагалоссяў з Расеяй у пытанні «ўсё ж паглядзець, як можна выканаць практычныя канкрэтныя рэчы».
ДР belsat.eu
