Прэм’ер-міністр Латвіі Крышʼяніс Карыньш назваў магчымымі пастаўкі нафты ў Беларусь праз латвійскія парты. Пра гэта ён заявіў 16 студзеня пасля сустрэчы з Аляксандрам Лукашэнкам.
У якасці прыкладу магчымай супрацы паміж краінамі латвійскі прэм’ер прывёў транспарт і лагістыку, піша БелТА.
«З аднаго боку, можна экспартаваць з Беларусі праз латвійскія парты нафтапрадукты. Але можна абмяркоўваць і іншую магчымасць – імпарт нафты з усяго свету праз Латвію ў Беларусь. Мы абмяркоўваем ужо такія магчымасці», – заявіў Карыньш па выніках размовы з Лукашэнкам.
Паводле яго, латвійскі ўрад «у найвышэйшай ступені зацікаўлены ў развіцці бізнес-магчымасцяў», але канкрэтныя тэрміны залежаць ад кампаніяў.
«Трэба мець стасункі з тэрміналамі, чыгуначнымі кампаніямі, якія будуць забяспечваць гэтыя пастаўкі», – адзначыў прэм’ер, падкрэсліўшы зацікаўленасць Латвіі ў больш доўгатэрміновых стасунках.
Напярэдадні візіту латвійскі амбасадар у Менску адзначыў, што схема беларуска-латвійскай супрацы наконт нафтапрадуктаў адпрацаваная і мае добрыя вынікі. Гэтак, у 2019 годзе экспарт нафтапрадуктаў праз латвійскія парты ў Беларусь па чыгунцы склаў 3,7 мільёна тонаў.
МГ belsat.eu