У Курапатах ад самай раніцы 4 красавіка камунальныя службы зруйнавалі больш за 70 крыжоў, якія Зміцер Дашкевіч ды іншыя актывісты паставілі мінулым летам побач з рэстарацыяй «Поедем поедим».
Улады каментаваць сітуацыю адмаўляюцца. Дырэктар Бараўлянскага спецыяльнага лясгасу Аляксандр Мірановіч у каментары БелТА сказаў, што адбываецца другая фаза добраўпарадкавання тэрыторыі, і цяпер прыбіраюць «незаконна ўсталяваныя аб’екты».
Belsat.eu спраўдзіў, ці працуе «рэстаран на костках». Аказалася, што бульдозеры, кардон з міліцыянтаў і спецтэхнікі не перашкаджае ўстанове карміць наведнікаў. Што дакладна адбываецца побач, у рэстарацыі не ведаюць.
«Мы як звычайна абслугоўваем, ужо прыехалі кліенты, паелі… а з крыжамі што… Нейкі плот хіба будуць ставіць».
Цяпер вядома пра затрыманне мінімум пяці чалавек. Гэта Павел Севярынец, Зміцер Дашкевіч, Ніна Багінская, Дзяніс Урбановіч і Валер Рабцаў.
Крыжы ў памяць аб ахвярах сталінскіх рэпрэсіяў цягам трыццаці гадоў усталёўвалі грамадскія актывісты.
ДР belsat.eu