Кроў на асфальце і сотні затрыманых. У Маскве дубінкамі разганяюць мітынг за свабодныя выбары

27 ліпеня паліцыя Масквы брутальна разагнала несанкцыянаваны мясцовымі ўладамі мітынг непадалёк ад Краснай плошчы.

Паводле ovdinfo.org, праваахоўнікі затрымалі 389 чалавек (па стане на 15:50).

Паліцыя ачапіла раён, дзе была запланаваная акцыя пратэсту.

Падчас разгону некалькі чалавек атрымалі траўмы і трапілі ў шпіталь.

У студыі YouTube-каналу «Навальный LIVE» праваахоўнікі зладзілі вобшук. Паліцэйскія прыйшлі таксама ў рэдакцыю тэлеканала «Дождь».

«У Сталешнікавым завулку сапраўдная бойня. Паліцыя б’е людзей дубінкамі, жорстка разганяе мітынгоўцаў», – паведаміла выданне «Новая газета».

Некаторым удзельнікам акцыі спачатку ўдалося прайсці праз паліцэйскія кардоны або ўцячы праз завулкі. Сілавікі не далі пратэстоўцам сабрацца каля гарадской думы. У выніку сфармавалася трохтысячная калона, якая прайшла побач з будынкам ФСБ і дайшла да Садовага кальца. Пазней натоўп апынуўся непадалёк ад метро «Трубная». Паліцыя прыехала і туды, і таксама пачала затрыманні.

Па стане на 21:30 лічба затрыманых вырасла да 1067.

Удзельнікі мітынгу патрабавалі зарэгістраваць незалежных кандыдатаў на выбарах у Маскоўскую гарадскую думу.

ЮВ belsat.eu