Кіраўнік чачэнскага офісу праваабарончага цэнтру «Мемарыял», палітвязень Аюб Ціціеў вызваліўся з калоніі. Нагадаем, 10 чэрвеня Шалінскі гарадскі суд задаволіў хадатайніцтва абароны аб умоўна-датэрміновым вызваленні Ціціева.
Пра вызваленне паведаміў праваабарончы цэнтр «Мемарыял».
Паводле Ціціева, ён адчувае сябе добра. У адказ на пытанне, ці працягне займацца праваабарончай дзейнасцю сказаў, што ён і не спыняў яе.
У сакавіку 2019 года праваабаронцу пакаралі чатырма гадамі калоніі-пасялення паводле абвінавачвання ў захоўванні наркотыкаў у буйным памеры. Ціціеў настойваў на тым, што наркотыкі яму падкінулі паліцыянты, а яго крымінальны пераслед ініцыявалі ўлады Чачэніі, каб перашкодзіць працы «Мемарыялу» у рэгіёне.
Калегі праваабаронцы ў «Мемарыяле» таксама лічаць, што Ціціева арыштавалі на падставе сфальсіфікаваных доказаў. Міжнародныя праваабарончыя арганізацыі Amnesty International, «Мемарыял» і Humans Rights Watch прызналі Ціціева палітвязням.
Летась Парламенцкая асамблея Рады Еўропы ўзнагародзіла чачэнскага праваабаронца прэміяй Вацлава Гаўла за мужнасць і выдатныя дасягненні ў галіне правоў чалавека.
ІІ belsat.eu