Двое беларусаў былі шпіталізаваныя ў Магілёве, бо ў іх западозрылі заражэнне кітайскім каронавірусам 2019-nCoV.
Пра выяўленне хворых паведамляе тэлеграм-канал NEXTA. Паводле яго, хворых выявілі ў магілёўскай гарадской паліклініцы № 4.
Факт шпіталізацыі двух чалавек з падазрэннем на каронавірус карэспандэнту belsat.eu пацвердзіў галоўны лекар паліклінікі.
«Прыехалі два чалавекі з Кітаю [беларусы. – Belsat.eu]. З тэмпературай. І ў нас узнікла падазрэнне, што ў іх можа быць каронавірус, таму мы спрацавалі паводле плану супрацьэпідэмічных дзеянняў і «хуткая» іх забрала ў інфекцыйную больніцу. Што там, будзе вядома заўтра раніцай, я думаю», – адзначыў суразмоўца.
Як паведамляе mspring.online, пасля інцыдэнту будынак паліклінікі быў на некаторы час зачынены з прычыны санітарнага апрацавання.
Успышка пнеўманіі, узбуджальнікам якой стаў невядомы раней тып каронавірусу, была зафіксавана ў кітайскім горадзе Ўу-Хань 31 снежня. Медыкі папярэджваюць, што сімптомы хваробы нагадваюць сімптомы грыпу: насмарк, кашаль, боль у грудной клетцы, кан’юнктывіт, падвышаная тэмпература, галаўны боль, слабасць і нават дыярэя.
Ад каронавірусу ўжо памерла 132 асобы, заразіліся – 5 974. Раней паведамлялася, што ў Беларусі некалькі асобаў шпіталізавалі з падазрэннем на «кітайскі» вірус, але дыягназ не пацвердзіўся.
МГ belsat.eu