У выніку крызісу, у якім апынулася Вялікая Брытанія з-за рашэння выйсці з ЕЗ, частка Кансерватыўнай партыі краіны задумваецца над тым, каб папрасіць каралеву Элізабэт II стаць на чале дзяржавы, калі прэм’ер-міністрам стане Барыс Джонсан, піша Бі-Бі-Сі.
Праціўнікі разрыву стасункаў з Еўразвязам, дэпутаты парламенту і сябры ўраду з Кансерватыўнай партыі маюць намер звяртацца да каралевы, каб яна ў якасці кіраўніка дзяржавы папрасіла ў ЕЗ новую адтэрміноўку выхаду Брытаніі, які прызначаны на 31 кастрычніка.
Такім чынам торы-праціўнікі Барыса Джонсана спадзяюцца перашкодзіць яму ажыццявіць рэзкі разрыў з ЕЗ.
Джонсан за жорсткі разрыў з ЕЗ
Новы прэмʼер-міністр краіны зʼявіцца ўжо ў наступную сераду, 24 ліпеня. Верагодна, што ім стане Барыс Джонсан.
Пры гэтым Джонсан абяцае пры любых абставінах вывесці краіну з Еўразвязу 31 кастрычніка, пасля заканчэння тэрміну дзеяння адтэрміноўкі. Гэта – галоўны пункт яго праграмы, і менавіта за гэтую пазіцыю яго падтрымлівае большасць сябраў Кансерватыўнай партыі.
Калі прэмʼер і напраўду паспрабуе вывесці Брытанію з ЕЗ 31 кастрычніка, то гэта будзе «абвальны» выхад без урэгуляваных адносін з Еўразвязам.
Змоўшчыкі ў парламенце Брытаніі
Вялікая група дэпутатаў і сябраў ураду ў Кансерватыўнай партыі, як і ўсе пяць апазіцыйных партыяў у Палаце абшчын, перакананыя, што рэзкі разрыў з ЕЗ балюча ўдарыць па эканоміцы Брытаніі.
Пры гэтым яны асцерагаюцца, што Барыс Джонсан, каб выканаць сваё абяцанне, можа проста праігнараваць волю парламенту. У яго ёсць для гэтага пэўныя працэдурныя магчымасці.
Каб пазбегчы гэтага палітыкі разглядаюць магчымасць прыняць у Палаце абшчын «ніжэйшы зварот» (гэта афіцыйны тэрмін – «humble address») да каралевы Элізабэт II з просьбай у якасці кіраўніка дзяржавы прадстаўляць краіну на саміце Еўразвязу восенню ў Бруселі і папрасіць новую адтэрміноўку брэкзіта.
Фармальна каралева зʼяўляецца кіраўніком дзяржавы, і мае поўнае права прымаць палітычныя рашэнні – але яна гэтым ніколі, ні разу за ўсе 67 гадоў кіравання, не карысталася.
Да яе ў XX стагоддзі кароль умяшаўся ў палітыку, усяго адзін раз, у 1931 годзе, прытым пад ціскам абставінаў. Гэта быў дзед Лізаветы, Георг V, і яму тады, ва ўмовах цяжкага эканамічнага і палітычнага крызісу, прыйшлося падштурхнуць партыі да стварэння ўраду нацыянальнага адзінства.
СК belsat.eu
