Кандрусевіч патрабуе ад Мінздароўя «больш адказаў»: «Я не ведаю, ці гэтая вада нясе з сабой заразу, ці не»
7 красавіка на прэс-канферэнцыі ў Менску арцыбіскуп Тадэвуш Кандрусевіч заявіў, што каталіцкі касцёл не можа атрымаць ад чыноўнікаў вычарпальныя адказы пра COVID-19.
Тадэвуш Кандрусевіч заявіў, што дзяржаўныя органы яго «не чуюць».
«Я не спецыяліст у гэтай справе, я не ведаю, ці гэтая вада нясе з сабой заразу, ці не. У суботу трэба будзе асвячаць пасхальную ежу – я таксама не ведаю. Я задаў пытанне Міністэрству аховы здароўя: “Што мы павінны рабіць? Чаму вы нічога не кажаце?!” Я праз вас, праз медыі, хачу сустрэчы з кімсьці адказным, канкрэтныя адказы каб былі», – сказаў Кандрусевіч.
Таксама арцыбіскуп Тадэвуш Кандрусевіч выказаў падзяку беларускім медыкам за іхную самаахвярную працу ў змаганні з эпідэміяй.
12 красавіка каталікі ўсяго свету будуць святкаваць Вялікдзень.
Медыкі раяць нічога не цалаваць у касцёлах і цэрквах, пазбягаць людных месцаў, а таксама просяць заставацца ўдома тады, калі гэта магчыма.
ЮВ belsat.eu
