Канапацкая распрацавала законапраект пра пенсію для Лукашэнкі

Дэпутатка Палаты прадстаўнікоў Ганна Канапацкая падрыхтавала законапраект «Аб гарантыях прэзідэнту Рэспублікі Беларусь, які спыніў выкананне сваіх паўнамоцтваў, і чальцам ягонай сям’і». Дакумент яна апублікавала ў «Facebook’у».

У бліжэйшы час Канапацкая плануе ўнесці законапраект на разгляд Палаты прадстаўнікоў.

«Пакідаючы за дужкамі пытанне якасці выбараў у Беларусі, мяркую неабходным выконваць усе асноватворныя дэмакратычныя прынцыпы, у тым ліку ў дачыненні да былых чыноўнікаў, дэпутатаў, прэзідэнтаў, забяспечыўшы іх на заканадаўчым узроўні», – заявіла дэпутатка.

Паводле яе, сёння ў беларускім заканадаўстве ў пытаннях пераемнасці і змяняльнасці ўлады маецца істотны прабел, які і мае выправіць законапраект.

Ганна Канапацкая. Фота https://www.facebook.com/anna.kanopatskaya

Дакумент прапануе забяспечыць былому прэзідэнту Беларусі пажыццёвую ахову, медычнае абслугоўванне, пенсію ў 75 % ад заробку прэзідэнта. Яму плануецца дазволіць карыстацца ўрадавай сувяззю, мець памочнікаў і жыць у адной з рэзідэнцыяў. Таксама службовы транспарт і медычнае абслугоўванне прапануецца надаць і блізкім сваякам былога кіраўніка дзяржавы.

Ягоныя жыццё і здароўе павінны быць застрахаваныя за кошт бюджэту на суму, роўную гадавому заробку дзейнага кіраўніка дзяржавы.

Лукашэнка распавёў, ці будзе балатавацца на шосты тэрмін

Таксама былы прэзідэнт павінен валодаць недатыкальнасцю, яго гонар і годнасць мусяць ахоўвацца законам. Яго нельга прыцягнуць да крымінальнай ці адміністрацыйнай адказнасці за дзеянні падчас выканання паўнамоцтваў прэзідэнта. Таксама забараняецца затрымліваць экс-кіраўніка краіны, арыштоўваць, падвяргаць ператрусу і допыту падчас следства паводле справаў, звязаных з выкананнем ім прэзідэнцкіх паўнамоцтваў.

Пасля смерці былога прэзідэнта дакумент прапануе выплачваць чальцам яго сямʼі штомесячную дапамогу ў дзесяціразовым памеры сацыяльнай пенсіі.

МГ belsat.eu

Hавiны