Каля беларускай амбасады ў Вашынгтоне 27 снежня прайшоў пікет пад лозунгам «Не саюзу з Расеяй!». Пра гэта паведамляе радыё «Свабода».
Арганізатарам акцыі было «Беларуска-амерыканскае задзіночанне» (БАЗА). Як адзначыў дырэктар па палітыцы і сувязях з грамадскасцю арганізацыі Валерый Кавалеўскі, пратэст быў накіраваны перадусім супраць палітыкі Аляксандра Лукашэнкі па паглыбленні інтэграцыі з Расеяй.
«Пастка, у якой апынулася Беларусь, з’яўляецца вынікам рашэнняў менавіта прэзідэнта Беларусі, які за 25 гадоў кіравання зрабіў нашу краіну цалкам залежнай ад Крамля і падпісаў пагадненне, якое з’яўляецца дарожнай мапай па ўваходжанні Беларусі ў склад Расеі», – заявіў ён.
Раней пратэсты супраць паглыблення інтэграцыі адбыліся ў Нью-Ёрку, Маямі, Лос-Анжэлесу і Філадэльфіі.
МГ belsat.eu