Некалькі тыдняў у хаце з мужам або жонкаю на каранціне можа стаць сапраўдным стрэс-тэстам для сям’і. Навукоўцы і практыкі цвердзяць, што эпідэмія COVID-19 можа зруйнаваць сямейнае шчасце. Чаму так адбываецца?
Філосаф Агюст Конт дабіваўся дазволу на развод з жонкаю 17 гадоў. У часы, калі жыў айцец сацыялагічнай навукі, развесціся было значна цяжэй, чымся памерці ад віруснай інфекцыі. Цяпер развод – звычайная фармальнасць. Падчас эпідэміі і каранціну сямейныя пары будуць часцей карыстацца правам сказаць адзін аднаму «бывай». На жаль, гэта навуковы факт.
У сярэдзіне сакавіка кітайскі таблоід «Global Times» паведаміў, што офісы рэгістрацыі шлюбаў у горадзе Сіань, сталіцы правінцыі Шэньсі, зафіксавалі рэкордную колькасць заяваў на развод. ЗАГСы ў гэтым горадзе распісалі сваю працу на некалькі тыдняў наперад. Мясцовыя чыноўнікі звязваюць такую лавіну разводаў з каранціннымі захадамі і неабходнасцю праводзіць шмат часу разам. Ня выключана, што гэта былі запланаваныя разводы, бо праз эпідэмію кітайскія офісы рэгістрацыі шлюбаў былі зачыненыя.
Паводле «Bloomberg», у кітайскім горадзе Міло склалася падобная сітуацыя. Адвакат Стыў Лі з Шанхаю, які займаецца разводамі, паведаміў «Bloomberg», што ў другой палове сакавіка, калі ў горадзе аслабілі каранцін, колькасць ягоных кліентаў вырасла на 25 %.
Вядомая брытанская адвакатка баранеса Фіона Шэклтан мяркуе, што эпідэмія павялічыць колькасць разводаў.
«Звычайна пік разводаў прыпадае на восень услед за летнімі адпачынкамі і пасля калядных вакацыяў. Можна толькі ўявіць, што будзе з сем’ямі, якія так доўгага сядзяць у хатах пад замком», – сказала Шэклтан у каментары выданню «The Telegraph».
Доктар псіхалагічных навук Кэтрын Коэн з Pennsylvania State University зрабіла ў 2002 годзе даследаванне пра ўплыў урагану Хуго (1989 год) на колькасць разводаў, шлюбаў і нараджальнасць у штаце Паўднёвая Караліна. З даследавання вынікае, што прыродны катаклізм паспрыяў росту разводаў у гарадах, якія пацярпелі ад стыхіі.
Стрэсавыя сітуацыі правакуюць нас з большай упэўненасцю прымаць лёсавызначальныя рашэнні, гаворыцца ў даследаванні. Тыя, хто моўчкі хацеў разводу, на фоне катастрофы могуць урэшце сказаць партнёру пра сваё «больш не магу». Той жа механізм дзейнічае, але ў адваротны бок, у выпадку шлюбаў – быць разам, калі ўсё гарыць і палае, прасцей.
У 2010 годзе даследчыца праверыла сваю тэорыю яшчэ раз. Яна прасачыла за статыстыкай разводаў у ЗША пасля тэрарыстычнай атакі на World Trade Center (11 верасня 2001 года). Рэакцыя амерыканцаў была падобная на тое, што адбылося пасля ўрагану Хуго.
Паводле Кэтрын Коэн, пандэмія COVID-19 будзе мець падобны ўплыў на структуру сем’яў, як і ў выпадку іншых прыродных або тэхнагенных катастрофаў – колькасць разводаў няўмольна будзе расці.
ЮВ belsat.eu