Каардынатар ініцыятыўнай групы Святланы Ціханоўскай па Берасцейшчыне Аляксандр Кабанаў паведаміў belsat.eu, што падчас ператрусу на лецішчы ў Сяргея Ціханоўскага ў Гомельскім раёне следчая група знайшла 900 тысяч долараў.
Як стала вядома Кабанаву ад сяброўкі Ціханоўскага, якая прысутнічала пры ператрусе, працэдура праводзілася тройчы трыма рознымі групамі.
«Учора ў Менску следчыя забралі маці Сяргея (яна дапамагала Святлане даглядаць дзяцей) і яны выехалі ў Гомельскі раён, на лецішча Сяргея. Пасля абеду пачаўся вобшук. Яны абшукалі ўсе збудаванні на ўчастку, забралі дакументы пнеўматычную стрэльбу і збіраліся ўжо ехаць у Гомель у кватэру маці. Аднак чамусьці засталіся нібыта пачакаць начальства», – кажа Кабанаў.
Потым змянілася яшчэ адна група, якая паўторна правяла вобшук і нічога больш не выявіла. Але і пасля гэтага следчыя засталіся чакаць на лецішчы.
«Каля часу ночы прыехала трэцяя група – маладыя хлопец і дзяўчына. Яны з панятымі зайшлі ў дом і знайшлі там 900 тысяч долараў у двух розных месцах. Прычым не ў тайніках, нічога не ўскрывалі, а проста сярод рэчаў, якія раней перагледзелі папярэднія групы. Купюры былі новыя», – распавядае Кабанаў.
Паводле ягонай інфармацыі, ператрус у Святланы Ціханоўскай у менскай кватэры не праводзіўся. У кватэры маці Сяргея ў Гомлі ён мусіць адбыцца сёння.
***
- Блогер Сяргей Ціханоўскі быў затрыманы 29 траўня ў Гродне падчас пікету па зборы подпісаў за вылучэнне кандыдатам у прэзідэнты ягонай жонкі Святланы Ціханоўскай.
- Затрыманне адбылося пасля таго, як адна з прысутных на пікеце жанчын справакавала канфлікт з Ціханоўскім, прыбылі міліцыянты, завязалася штурханіна. У выніку міліцыянт упаў, яго забрала хуткая дапамога.
- 30 траўня МУС заявіў, што распачатая крымінальная справа аб гвалце ў дачыненні да працаўніка органаў унутраных спраў. Паводле міліцыі, пацярпелі двое працаўнікоў, яны шпіталізаваныя.
- Агулам у рамках справы затрыманыя 9 асобаў, частка з іх пераведзеная ў менскае СІЗА №1 на Валадарскага, у большасці прайшлі ператрусы.
- Спіс затрыманых:
- Сяргей Ціханоўскі
- Яўген Разнічэнка
- Зміцер Фурманаў
- Вяргілій Ушак
- Уладзімір Навумік
- Аляксандар Арановіч
- Сяргей Калмыкоў
- Васіль Баброўскі
- Арцём Сакаў
Пераслед і затрыманні прыхільнікаў Сяргея Ціханоўскага працягваюцца па ўсёй краіне.
З 24 траўня людзі ў розных гарадах Беларусі становяцца ў кіламетровыя чэргі, каб падпісацца за Святлану Ціханоўскую.
КА belsat.eu
