Пра першыя крокі Аляксандра Лукашэнкі ў палітыцы распавядае чалавек, які напачатку 1990-х запусціў ягоную прэзідэнцкую кар’еру.
Яны разам гулялі ў футбол у камандзе Вярхоўнага Савету. І менавіта гэты чалавек на адным з пасяджэнняў парламенту даў старт прэзідэнцкай кар’еры Аляксандра Лукашэнкі. Яны разам выйгралі той палітычны марш, а потым сталі зацятымі супернікамі.
«У аснове сюжэту гісторыя двух маладых на той час палітыкаў, якія абодва паходзілі з вёскі, а пазней працавалі ў адной камандзе ў Вярхоўным савеце, – распавядае рэжысёр дакументальнага фільму «Гульня без правілаў» Антось Цялежнікаў. – Пасля яны пяройдуць у адкрытую канфрантацыю і стануць па розныя бакі барыкадаў».
Антось Цялежнікаў падкрэслівае, што хацеў зняць аб’ектыўны фільм, без хэйту і сатыры, з унікальнай відэахронікай 1990-х і выказваннямі сведкаў тых падзеяў.
«Мы паказваем, якім чынам былы дырэктар саўгасу змог стаць першым прэзідэнтам Беларусі, хто і што гэтаму паспрыяла, – тлумачыць ён. – Гэта такая палітычная анатомія 1990-х. Мы шмат прысвяцілі тэме незалежнасці і таму, якім чынам яна нам дасталася. Пра гэта фактычна не было раней фільмаў».
У «Гульні без правілаў» дэпутата Лукашэнку ўзгадваюць тыя, хто ведаў яго яшчэ да прэзідэнцтва. Сярод іх – Сяргей Антончык, аўтар антыкарупцыйнага дакладу пра атачэнне новаабранага кіраўніка дзяржавы, слухаючы які Аляксандр Лукашэнка пусціў слязу.
Як Аляксандр Рыгоравіч хацеў дамовіцца з Зянонам Пазняком і ўзначаліць у Вярхоўным Савеце фракцыю… Беларускага народнага фронту? У чый аўтамабіль ён патаемна загрузіў цэлы багажнік гуркоў? І як дзякуючы Віктару Шэйману, якога пазней абвінавацяць у датычнасці да забойства апазіцыянераў, бел-чырвона-белы сцяг у 1991-м стаў дзяржаўным?
Глядзіце новы фільм «Белсату» «Гульня без правілаў» (відэа вышэй).
ІА belsat.eu