«Груба парушаў грамадскі парадак». Мікалай Статкевіч распавёў падрабязнасці абвінавачвання

Беларускі палітык Мікалай Статкевіч, які зараз знаходзіцца ў СІЗА №1 у Менску, сустрэўся з адвакатам і распавёў таму падрабязнасці свайго затрымання, піша Telegram-канал «STATKEVICH».

Мікалай Статкевіч 30 чэрвеня сустрэўся з адвакатам Уладзімірам Сазанчуком. Сустрэча цягнулася каля 10 – 15 хвілінаў, аднак ён паспеў паведаміць некаторыя падрабязнасці сваёй справы.

Палітык перадаў словы падтрымання ўсім людзям, якія яго падтрымліваюць. Telegram-канал прыводзіць ягоныя словы: «гонар ім, рэспект і павага».

Мікалай Статкевіч. Фота: Ірына Арахоўская / Belsat.eu

Зараз Статкевіча падазраюць у злачынстве, прадугледжаным ч.1 арт. 342 КК Рэспублікі Беларусь. Паводле абвінавачвання ён разам з групаю асобаў па папярэдняй змове з Ціханоўскім, Арановічам, Сакавым, Фурманавым, Новікавым і іншымі асобамі, размеркаваў ролі і ўзгадніўшы дзеянні, пад фармальным повадам збору подпісаў за Святлану Ціханоўскую, арганізаваў незаконны мітынг, які парушаў грамадскі парадак.

Падчас мітынгу людзі не падпарадкоўваліся патрабаванням прадстаўнікоў улады, пераўтварыўшыяся ў гвалт у дачыненні да супрацоўнікаў АУС і супраціву іхнай законнай дзейнасці і прымусу да змены характару гэтых дзейнасці.

Пікет у Горадні 29 траўня. Фота: Васіль Малчанаў / «Белсат»

Сутнасць абвінавачванняў такая ж, як і ў арыштаваных чальцоў каманды «Страны для жизни», а таксама блогераў і актывістаў. Іх аб’ядноўвае адна справа.

Сам жа Статкевіч назваў падазрэнні абсурднымі. Ён кажа, што аніякага злачынства не здзяйсняў, а ў Горадні быў апошні раз увосень.

Таксама Статкевіч паведаміў, што на ЦІПе ў ягоны бок былі розныя правакацыі, аднак дэталямі ён падзяліцца не здолеў.

Мікола Статкевіч ад 29 чэрвеня знаходзіцца ў СІЗА №1 у Менску. Сёння, 30 чэрвеня, ён быў прызнаны беларускімі праваабаронцамі палітзняволеным.

КТ belsat.eu

Hавiны