У Цэнтральным судзе Гомлю справу супраць «Белсату» спынілі праз «непадсуднасць», бо тэлеканал застаецца замежнай юрыдычнай асобаю. Да фрылансера Кастуся Жукоўскага таксама не маюць прэтэнзіяў, бо, паводле рашэння суда, звесткі, на якія спасылаўся пазоўнік, не ўтрымліваюцца ў сюжэце.
Гаворка ідзе пра матэрыял, размешчаны на belsat.eu «Міліцыянты б’юць журналістаў. Міліцыянт падае ў суд на Кастуся Жукоўскага».
Аўтар позвы – начальнік Лоеўскага РАУСу Уладзімір Бухаўцоў, які абразіўся на журналіста праз тое, што на нашым тэлеканале выйшаў відэасюжэт з удзелам міліцыянта ды інфармацыяй пра ягоныя неправамерныя дзеянні адносна фрылансера.
5 студзеня суд Цэнтральнага раёну Гомля прыцягнуў у якасці суадказчыка тэлеканал «Белсат» па пазову Бухаўцова аб абароне гонару, годнасці і дзелавой рэпутацыі.
Міліцыянт патрабаваў ад журналіста зняпраўдзіць інфармацыю ды сплаціць маральную кампенсацыю памерам Br 2000.
21-га чэрвеня 2016-га ў Лоеве падчас здымкаў сюжэту для нашага тэлеканалу Кастуся Жукоўскага разам з Аляксеем Атрошчанкавым брутальна затрымалі міліцыянты. Ужо ў РАУСе на журналістаў надзелі кайданкі, выкручвалі рукі, кідалі на падлогу і збівалі нагамі. Пазней пра такі гвалт з боку міліцыі адносна мясцовых жыхароў распавялі і самыя лоеўцы.
- «Чорнакапацель», зброя, сюжэт «Белсату» і пагрозы забраць дзяцей. Заблытаная правінцыйная гісторыяі
- Міліцыя і падаткоўцы ціснуць на сямʼю незалежнага журналіста Кастуся Жукоўскага
ДР belsat.eu
