Ён рабіў стрым з акцыі 7 траўня ў падтрыманне Сяргея Ціханоўскага.
Блогер з Гомля Іван Рэмязоўскі (канал Za Belarus) быў затрыманы 7 траўня адразу пасля акцыі ў падтрыманне блогера Сяргея Ціханоўскага. Позна ўвечары яго выпусцілі, але ў пятніцу 8 траўня затрымалі наноў.
Судзіць яго маглі 8 або 11 траўня. Увесь гэты час Рэмязоўскі знаходзіўся ў Ізалятары часовага ўтрымання.
Як стала вядома праваабарончаму цэнтру «Вясна», Рэмязоўскаму далі 15 содняў адміністрацыйнага арышту. Выйсці на волю ён мусіць 23 траўня.
Паводле «Вясны», мясцовыя міліцыянты доўга хавалі, што Рэмязоўскі знаходзіцца ў іх. Толькі калі мясцовыя актывісты прыйшлі ў апорны пункт, каб пісаць заяву аб ягоным знікненні, блогера раптоўна знайшлі.
Апроч Рэмязоўскага ў Гомельскім ізалятары часовага ўтрымання яшчэ адбываюць адміністрацыйны арышт блогер Сяргей Ціханоўскі (15 содняў), Аляксей Саламашэнка (15 содняў), Юры Уласаў (таксама 15 содняў).
У апошні тыдзень некалькі дзясяткаў чалавек па ўсёй Беларусі былі пакараныя за ўдзел або асвятленне акцыяў у падтрыманне Сяргея Ціханоўскага.
КТ Belsat.eu
