«Гэта паваротны момант». САЗ заклікала Беларусь да неадкладных захадаў па барацьбе з каронавірусам
Эпідэмія каронавіруса ў Беларусі перайшла ў новую фазу, таму патрабуецца неадкладнае ажыццяўленне дадатковых захадаў, у прыватнасці захадаў па фізічным дыстанцыяванні. Пра гэта гаворыцца ў справаздачы САЗ.
Справаздача падрыхтаваная па выніках візіту місіі САЗ у Беларусь 8-11 красавіка.
«Беларусь увайшла ў новы этап эвалюцыі пандэміі COVID-19 з перадачай інфекцыі сярод насельніцтва, што асабліва прыкметна ў асобных частках краіны, уключаючы сталіцу Менск, горад Віцебск і Віцебскую вобласць. Сітуацыя выклікае заклапочанасць і патрабуе неадкладнай рэалізацыі ўсёабдымнай змяшанай стратэгіі», – падкрэсліваецца ў дакуменце.
САЗ заклікае прыняць агульнанацыянальныя меры па ўзмацненні фізічнага дыстанцыявання. Да захадаў фізічнага дыстанцыявання адносяцца:
- перанос усіх масавых спартыўных, культурных, палітычных і рэлігійных мерапрыемстваў;
- забеспячэнне далейшай ізаляцыі пацыентаў з COVID-19 і іх кантактаў;
- укараненне фарматаў выдаленай працы і дыстанцыйнага навучання, прыпыненне дзейнасці ўсіх другарадных арганізацыяў, прадпрыемстваў і эканамічных субʼектаў;
- забеспячэнне строгага выканання мераў прафілактыкі і інфекцыйнага кантролю на тых працоўных месцах, дзе немагчымая выдаленая праца;
- забеспячэнне адлегласці паміж работнікамі, абмежаванне колькасці нарад і сустрэчаў, забеспячэнне належнай вентыляцыі;
- мінімізацыя неабавязковых перасоўванняў, асабліва для групаў высокай рызыкі.
«Гэта паваротны момант для Беларусі ў яе дзеяннях у адказ, і таму патрабуецца неадкладнае ажыццяўленне дадатковых захадаў, у прыватнасці захадаў па фізічным дыстанцыяванні», – падкрэсліваецца ў справаздачы.
У дакуменце таксама адзначаецца важнасць таго, каб улады Беларусі на ўсіх узроўнях «забяспечвалі разуменне шырокай грамадскасцю і мясцовымі супольнасцямі рызык і захадаў, якія прымаюцца падчас пандэміі».
У Беларусі на дзень 28 красавіка зарэгістраваныя 12 208 выпадкаў каронавіруснай інфекцыі, 79 чалавек памерлі.
ІІ belsat.eu
