Гэта не проста хлеб, а філасофія. Як юрыстка з 20-гадовым стажам прыйшла ў пекары?

Дэгустацыя самаробнага хлеба. Фота belsat.eu

Чорны, белы, хлеб з семечкамі, кунжутам, разынкамі, курагою ды іншыя. У Гомлі на пляцоўцы «Свая палічка» прайшла дэгустацыя самаробнага хлеба. Майстры знаёміліся, дзяліліся досведам, рэцэптамі ды нават закваскаю і, натуральна, частавалі наведнікаў сваім хлебам. Да адной з удзельніц імпрэзы, 40-гадовай Вольгі Бахметавай, мы завіталі напярэдадні сустрэчы, каб паназіраць за працэсам выпякання хлеба і паразмаўляць пра змены ў жыцці, якія адбыліся ў сувязі з новым хобі.

Вольга, чаму вы сталі пячы хлеб?

Тры гады таму ўся нашая сям’я прыняла рашэнне есці смачны хлеб, бо тое, што мы куплялі ў краме, вельмі хутка станавілася рознакаляровым – жоўтым, зялёным ад цвілі. Незразумела, што ты ясі, гэта было непрыемна. Потым выпадкова ў хату прыйшла закваска (смяецца).

Проста аднойчы знаёмая прынесла ў дом закваску, прычым нічога пра выпяканне не распавяла. Таму ўсё дадавала інтуітыўна, і вынік, адпаведна, атрымліваўся розны: адзін раз атрымлівалася, другі ўжо не.

Вольга Бахметава за выпяканнем хлеба. Фота belsat.eu

І мой муж у інтэрнэце знайшоў мне онлайн-школу хлеба на заквасцы Карнышовых. Яны навучылі мяне пячы з гарантаваным вынікам. Яны не толькі добра навучылі мяне пячы хлеб, але нават цяпер я ў іх працую ў тэхнічным падтрыманні, то бок навучылі і зарабляць.

Хлеб можа быць подавы альбо фармавы (цаглінка, выпечаная ў форме). Фота belsat.eu

Вы ж на той момант былі ў дэкрэтным адпачынку для догляду дзіцяці і працавалі юрысткаю…

Калі пастанавіла займацца хлебам – звольнілася з працы, бо яна мне не прыносіла задавальнення. Вось з хлебам ты прыкладаеш нейкія намаганні, назіраеш, перажываеш нават і маеш вынік. Юрысткай я мела нейкі вынік, але росту не было, усё, што магчыма ў той сферы, у мяне здарылася, і таму захацелася чагосьці іншага.

А ў чым разнастайнасць працэсу выпякання хлеба?

Ты робіш закваску – і яна заўжды розная: сёння так сябе паводзіць, а заўтра інакш. Трэба разумець тое, што адбываецца. Хлеб можа атрымацца розны.

Хлеб можа быць подавы альбо фармавы (цаглінка, выпечаная ў форме). Фота belsat.eu

Што такое закваска?

Трэба змяшаць муку ды ваду і даць ёй брадзіць. Працэс вывядзення закваскі можа займаць тыдзень. А потым ты проста яе падкормліваеш. Гэта гадунец. У мяне жытнёвая і пшанічная закваска. На самым зерні ёсць мікраарганізмы, мы змешваем муку з вадой, адбываецца браджэнне ў цяпле і рост дзікіх дрожджаў ды малочнакіслых бактэрыяў. Закваска расце 5-8 гадзінаў, потым мы ставім апару (дадаём ваду і муку). На апары замешваем цеста і ставім яго расстаяцца (для далейшага браджэння). Хлеб можа быць подавы або фармавы (цаглінка, выпечаная ў форме).

Працэс падрыхтоўкі да выпечкі хлеба можа займаць да 14 гадзінаў. Фота belsat.eu

Працэс прыгатавання хлеба займае ў сярэднім у залежнасці ад гатунку ад 14 гадзінаў да содняў. Асабіста я выпякаю «Барадзінскі», «Тры семечкі» (з дадаткам семечак сланечніку, кунжуту, лёну) і ржаны хлеб. Гэта самыя запатрабаваныя гатункі хлеба.

Чым ваш хлеб на заквасцы адрозніваецца ад крамнага на дражджах?

Смак адрозніваецца, і хлеб на заквасцы больш карысны для страўніка. Мой хлеб ніколі не цвіце, ні белы, ні чорны. Працэсы браджэння ўжо скончаныя, а крамны хлеб яшчэ працягвае брадзіць у страўніку, таму мы адчуваем пэўны дыскамфорт ад гэтага працэсу.

Вольга Бахметава. Фота belsat.eu

Як змянілася вашае жыццё, калі вы пачалі выпякаць хлеб?

Я ўжо магу накарміць хлебам сябе, мужа, дзяцей іншых. Для мяне гэта не проста хлеб, гэта філасофія нейкая. Праз хлеб прыйшла фінансавая кампетэнцыя. Трэба ж было пралічыць сабекошт кожнага бохана, знайсці кліентаў. Гэта было так страшна – прадаць першы хлеб.

Калі ты ўвесь час працуеш за заробак, гэта адно, а цяпер прадпрымальніцкая дзейнасць, усё залежыць ад цябе. Крылы распраўляюцца, можаш зарабляць. У маім жыцці з’явіліся новыя людзі, цікавыя знаёмствы.

Самаробны хлеб. Фота belsat.eu

Вольга, вы лічыцеся самазанятым чалавекам, плаціце падатак. Ці можа быць гэтая дзейнасць альтэрнатываю поўнай занятасці, ці можна з гэтага жыць?

Асабіста для мяне гэта падпрацоўка, бо працэс займае даволі багата часу, і каб пячы хлеб у вялікіх аб’ёмах, трэба толькі гэтым і займацца. У мяне няшмат кліентаў, я не стаўлю гэта на паток. Я пяку ў сярэднім 15 боханаў некалькі разоў на тыдзень. Кошт адной буханкі – 5 рублёў. Абʼёмы рэалізацыі залежаць таксама ад асартыменту, ці вялікая лінейка прадуктаў, колькі кліентаў. У нас вельмі часта сітуацыя такая: чалавек пачынае пячы для сябе, сям’і, потым на продаж, потым ладзяць майстар-класы па выпяканні хлеба. Асабіста мне цікава ўжо і выкладанне.

Вольга Бахметава. Фота belsat.eu

Ганна Кавальчук, фота аўтаракі belsat.eu

Hавiны